Ñahendu Hesu. Lunes 15ª Tiempo Durante el Año

Escucha el evangelio y la reflexión en: https://youtu.be/r__WpPdqQfY

Lunes 15º Durante el Año Mateo 10, 34 – 11, 1

Upérõ Hesu he’i idisípulokuérape: Ani peimo’ã che ajuha aguerúvo py’aguapy ko yvy ári. Nahániri. Ndaguerúi py’aguapy, ñorãirõ uvei katu.

Che aju amoingo vaívo ta’ýra túvandi, mitakuña isýndi, ha tembireko iména sýndi. Pende rogapýpe voi oĩta ija’e’ỹva pende rehe.

Pe itúva térã isýpe ohayhuvéva che hegui, ndikatu mo’ãi oiko che disípulo ramo. Pe ohayhuvéva ta’ýra térã tajýra che hegui, upéichante avei. Ha pe ohupi’ỹva ikurusu ijapére che moirũ haguã, péva ndaha’éi che rehegua. Pe hekovére hakate’ỹva, omanóta. Pe omanóva che rehehápe katu, ojesalváta.

Oĩ ramo pene moguãhẽ porãva, chéve che moguãhẽ ramo guáicha hína. Ha upe chéve che moguãhẽva, omoguãhẽ avei che mbouharépe. Umi profétape omoguãhẽva katu, proféta haguérente pe oguãhẽva, umívape Ñandejára ome’ẽta pe ha’e ome’ẽva profétakuérape.

Oĩ ramo ymínte jepe ome’ẽva che disípulope, michĩvévape jepe, che ha’e peẽme, Ñandejára ndahesarái mo’ãiha chugui.

Jesús ombo’epa rire umi 12 disípulope, osẽ oho upégui, ombo’e ha oñemoñe’ẽ haguã
umi pueblo upe rupigua rupi.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ñane kuã jepe ningo ndaha’éi peteĩchapa, he’i lo mitã. Ojuavýramo jepe ojuehegui ningo ñamomba’apo oñondive. Ha ñande rógagua ndive jepe jajuavýramo vyroreiete rehe sapy’a, umi ndaha’éiva ñane hénte ndive katu ko’yteve ikatu jajuavy.

Hesu ñanemomarandu hina jaguatáramo hendive ha ñañeha’ãramo jepe jaiko porã opavave ndive, ikatuha oĩ ñande rape jokoséva ha ndogustáiva ichupe Ñandejaŕa rape. Ñande rogagua jepe ningo ikatu ñande rape jokose ha ombovai ñande jerovia ha ñane compromiso.

Ndajahekáiramo jepe upe joavy térã jeiko vai, jaikuaa hina opu’ãtaha ñaimo’ã’ỹ haguiete. Upépe ñaguahẽramo ha oiméramo tekotevẽ jaiporavo, Hesu he’i ñandéve ñande ñane ñe’ẽ renduve vaerã Ñandejárape umi ambuégui.

Ñamotenonde va’erã hembipota, jaheja jahejáva, ani jajepy’apy, he’i Hesu. Jaha hese ñande rape’ípe ha Ñandejaŕa omohendapáne ñandéve ágã iporã haguãicha amo ipahápe.

Ha jaikuaa avei jaguata aja umi javorái pa’ũme oĩ vaerãha katuete ñane pytyvõva ha ñanembopiro’ýva ñande guatápe.

Umívape Ñandejára tuicha omyengoviáta ohechakuaa haguére Hesu irũ jehasa asy, oipytyvõ ramo guáicha Hesu etépe voi. Ha upéicha ko hína, che reindy ha nde che irũ.

Sapy’ánte ñande jaheka orahami va’erã ñanendive ñande kurusu, ha sapy’ánte katu ñandéve otoka ñambovevúi ñande rapicha oisu’úva hína iro kuete ha ñambopiro’y imi ikorasõ.

Pa’i Alberto Luna.