Ñahendu Hesu. Lunes 16ª Tiempo Durante el Año

Escucha el evangelio y la reflexión en: https://youtu.be/Q2IA9JWag4M

Lunes 16º Durante el Año

Mateo 12, 38 – 42

Upérõ, umi fariséo ha umi Moisés léi ombo’éva he’i Jesúspe: — Mbo’ehára, rohechase niko rejapórõ peteĩ milágro.

Jesús katu he’i chupekuéra: — Peẽ tekove ahẽ jerovia’ỹ. Pehechase milágro, ajépa.

Ndapehecha mo’ãi. Upe Ñandejára ohechaukátava peẽme niko hína ku proféta Jonáspe ojehu vaekue. Proféta Jonás milagrokuénte ahejáta peẽme. Ku Jonás oĩ haguéicha mbohapy ára ha pyhare pe pira guasu ryépe, péicha avei apyta va’erã ágã che mbohapy ára ha pyhare yvyguýpe.

Ágã ára pahápe, umi Ninivegua opu’ãne ha pene moĩ vai Ñandejára renondépe pene rembiapo vai haguére. Ha’ekuéra niko ohejapa va’ekue ipekádo Jonás oñemoñe’ẽrõ chupekuéra. Ha che ha’e peẽme, ko’ágã oĩ hína pende apytépe peteĩ tuichavéva Jonásgui.

Ágã ára pahápe, opu’ãne avei ku Reina del Sur, ha pene moĩ vai Ñandejára renondépe pene rembiapo vai haguére. Ha’e niko mombyrýgui ou va’ekue ohendu haguã Salomón arandukue. Ha che ha’e peẽme, ko’ágã oĩ hína pende apytépe peteĩ tuichavéva Salomóngui.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ndahecháiramo ndarovia mo’ãi. He’i niko Santo Toma. Ha ñande avei niko jahechase raẽ upéi jarovia haguã upe oje’éva ñandéve. Ko’ápe katu Hesu he’i umi fariseo ha umi karai arandúpe jajerovia va’erãha ñande rapicha ñe’ẽre jahecha haguã upéi añeteha upe he’íva ñandéve.

Ha’e kuéra niko ndojeroviáigui Hesúre ou ojerure ichupe ojapo haguã henondépe kuéra peteĩ milágro, uperire ojerovia haguã hese.

Ohechase añetépa ha’e ikatupyry ha orekópa pe Ñandejára pu’aka ijehe. Ha Hesu oja’o haguéicha Santo Tomáme ndojeroviái haguére hapicha ñe’ẽre, oja’o avei chupekuéra ipy’a ratã haguére. Ha omoĩ ichupekuéra mokõi káso: Tenonderã pe proféta Jonás oho va’ekue Nínive pueblo pe, hembiapo vaietéva, ha oñemoñe’ẽ ichupekuéra oguerova haguã hekove ani haguã oñehundipa.

Ha’ekuéra ohendu rire Jonás ñe’ẽ ojerovia hese ha ojapo hikuái upe he’íva ichupekuéra ha ojesalva. Ha upéi ave omombe’u ichupekuéra pe Reina de Saba ojapo va’ekue mombyryetégui ou ramo guare ohendu haguã Salomón ñe’ẽ arandu.

Ndohechái ha nohendúi ramo jepe Salomón pe, ojeroviágui ambue ñe’ẽre ou ha’e ha ohendu rire orovia añete iñaranduha upe Rey Salomón.

Umíva ningo ojerovia rupi ohecha umi oje’e va’ekue ichupekuéra, ha hetave milagro ave ohecha hapykuéri. Umi ndojeroviáiva voi hapicha ni Ñandejárare katu yvága jepe ojepe’áramo henondépe ndorovia mo’ãi.

Mba’éichapa nde che irũ ha che reindy reñandu oimeha nde jerovia. Reha’arõpa Ñandejára omboguejy ndéve yvágagui upe reipotáva rejerovia haguã hese. Térãpa rerovia opa umi erekóva ha ehupytýva ha’eha Ñandejaŕa remime’ẽ oguejýva ndéve guarã yvágagui.

Pa’i Alberto Luna.