Ñahendu Jesús Ñe’ẽ. Miércoles 16º Durante el Año

Escucha el evangelio y la reflexión en: https://youtu.be/FzyBIeOxaqs

Miércoles 16º Durante el Año Mateo 13, 1 – 9

Pe árape Jesús osẽ hógagui ha oho Lágo Galiléa rembe’ýpe. Upépe oguapy oñe’ẽ haguã. Ha heta oĩ ijatýva ijerére.

Upémarõ ojupi oguapy peteĩ kanóape, umi ou va’ekue katu opyta oñembo’y pe y rembe’ýpe. Heta mba’ére oñe’ẽ chupekuéra. Ha omombe’u chupekuéra káso omyesakã haguã pe he’íva.

He’i chupekuéra: Oiko ndaje raka’e peteĩ osẽva oñemitỹ. Ha omosarambívo pe semílla, oĩ ho’áva tapépe ha ou guyrakuéra ho’upa. Oĩ avei ho’áva itatýpe, yvy ipererĩháme ha voi heñói. Kuarahy ojopévo katu hakã manomba, ha ndahapo pypukúigui ipirupa. Oĩ ave ho’áva ñuatĩndýpe. Ñana okakuaávo katu, ojaho’ipa ha ojuka. Oĩ katu ho’áva yvy iporãháme, ha upépe hi’a heta. Oĩ hi’áva 100, oĩ hi’áva 60 ha oĩ hi’áva 30.

Upéi Jesús he’i chupekuéra: “Ohendu kuaávake tojapysaka.”

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ñande niko ñañotỹta jave peteĩ semilla porã jaipotáva heñói ha upéi opu’ã okakuaa, ha hi’a porã ñandéve, jaheka raẽ mamópa ñañotỹta. Ñambojere ha ñamohu’ũ pe yvy, jaipe’a umi ita, ha ikatúramo ñamoĩ ichupe abono mi.

Upéi ñañotỹ haguã la ñande semilla porã. Ha ñañotỹ rire katu jarregáne pya’eve heñói haguã ñandéve. Nañañotỹi ningo itatýpe, térã katu ñuatĩ apytépe.

Ñahendu angete Jesús ojupi peteĩ kanóa y rembe’ýpe hetaitereígui umi oñembojáva hese, oñehendu porãve haguã pe he’íva chupekuéra. Oñe’ẽvo ha ombo’évo ohechakuaa ha’e heta ha opaichagua tapicha ouha ohendu ichupe. Ha upémaramo omombe’u ichupekuéra pe káso ombojojávo pe iñe’ẽ peteĩ semilla porãre Ñandejára oñotỹva ijapytépekuéra.

Jesús niko hína pe oñemitỹva ijapytépe kuéra, ha oñandu ha’e ndaha’éi opavave ohendúva ichupe ha omboguapýva ikorasõme upe iñe’ẽ. Oime niko ipy’a ratãva itáicha. He’íva ñe’ẽ “ndoikéiva voi hese bala”. Oime umi ohendúva ha upéi ou iñakãme guyráicha, antóho, tentación, ha ho’upa ichugui pe semilla porã.

Oime avei ipererĩva, sapy’amínte oguerohorýva Ñandejára ñe’ẽ ha upéi ojehejáva ipohýi vove tape. Oĩ katu pe yvy porãicha ohendúva Jesús ñe’ẽ, omboguapýva ipy’áre ha hekovépe, heñói ipype, hi’a porã ha heta.

Ñandejára imba’e porãgui oñemitỹ opárupi ha opa ára ñande rekovépe. Yvy porãme ha yvy vaípe, itaty ha ñuatĩndýpe opoi ha’e pe isemilla porã. Itiémpope ha itiémpope’ỹ oñemitỹ. Noñongatúi ha nombyasýi umi semilla porã. Oikuaa ha’e umíva apytépe oime va’erã heñóiva ha hi’a porãva. Ha péva ñanemokyre’ỹ avei ñandéve che irũ ha che reindy, ani haguã ñanekane’õ ñañemitỹ haguã umi semilla porã Ñandejára ohejáva ñande pópe.

Pa’i Alberto Luna.