Ñahendu Jesús Ñe’ẽ. Lunes 24º Durante el Año

Escucha el evangelio y la reflexión en: https://youtu.be/6ucXSuW8flg

Lunes 24º Durante el Año Lucas 7, 1 – 10

Jesús ombo’epa rire umi hese ojapysakávape, oho Cafarnaúmpe. Upépe oiko peteĩ kapitan rromagua ohayhúva hembiguái peteĩme. Hasy nimbo ra’e hína ha’e, ha omano mbotáma.

Pe kapitan ohendúvo umi mba’e oje’éva Jesús rehe, omondo hendápe karaikuete hudíokuéra apytégui ojerurévo chupe ou hag̃ua oipohano hembiguáipe. Ha og̃uahẽ hikuái Jesús rendápe ha he’i chupe: — Iporãite va’erã niko reipytyvõ ramo pe kapitánpe.

Ñande rayhu porã niko ñande hudíokuérape. Ore tupaorã jepe niko omopu’ã oréve. Ha Jesús oho hendivekuéra. Ha oguahẽ potávoma pe kapitan rógape, omondo ha’e iñirũ nguérape he’i hag̃ua chupe: “Mbo’ehára, mávaiko che, nde reg̃uahẽ hag̃ua che rógape.

Upévare voi, nda che py’ái kuri ahávo chete roheka. Eréntena che rembiguái okuerataha, ha okueráta. Che niko aĩ che ruvicha po guýpe, ha areko avei che po guypegua. Peteĩme ha’érõ oho hag̃ua, upéva oho. Ambuépe ha’érõ ou hag̃ua, upéva ou. Ha ha’érõ che rembiguáipe ojapo hag̃ua che ha’éva, ojapo.”

Jesús ohendúvo upéva oguerohory eterei. Ha ojere he’i umi hapykuéri oúvape:— Añete ha’e peẽme, Israelgua apytépe jepe ndajuhúi peteĩnte jepe peichaite peve ojeroviáva che rehe.Ha umi oñembou va’ekue oguahẽvo hógape, ojuhu pe kapitan rembiguái okueráma hague.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Mba’etekópa ñañeñandúta oguahẽramo sapy’a ñande rógape peteĩ karai guasu, ministro, gobernador, térã karai obíspo mba’e. Ajépa ningo japytáne jaikuaa’ỹre mba’éichapa jajapóta jaguerohory haguã, mba’épa ja’éta, mba’épa ñame’ẽta ichupe, moõpa ñamboguapýta ha mba’e.

Ha upéva niko upe oñandúva raka’e ko kapitán Rróma gua. Otĩ omoguahẽ haguã ichupe hógape. Ha’e ningo oiméne oikuaa mba’éichapa umi hudíokuéra ndaija’éi umi Rróma guáre, omoĩgui hi’árikuéra impuesto pohýi, ha mbaretépe oreko haguére tetã Israélpe. Ha upévare ko oiméne avei otĩ ha’e Jesúgui.

Rróma gua herakuã vaíramo jepe, pe kapitan ipy’a porã, ohayhu ha ojepy’apy hembiguáire, oñeha’ã oipohano. Ha ndaha’éiramo jepe irreligión gua, ohayhu avei umi tavaygua kuérape, omopu’ã ichupekuéra itupao. Hesu oñandu péva, oguerohory eterei ojerovia lája hese, ha omonguera hembiguáipe.

Pe mísa hápe niko opyta ñandéve, che irũ ha che reindy, ko soldado rromagua ñe’ẽngue. Ñañemboja mboyve ñakomulga ja’évo: “Ñandejára Jesucristo, máva piko che romoguahẽ haguã che rogapýpe, eréntena peteĩ ñe’ẽ ha che resãimane apytávo”.

Pa’i Jasy.