Ñahendu Jesús Ñe’ẽ. Lunes 2º de Paskua

Escucha el evangelio y la reflexión en: https://youtu.be/y2KQo2jxQ3c

LUNES 2º PÁSKUA

San Juan 3, 1-8

Oiko va’ekue peteĩ fariséo hérava Nicodemo, herakuã guasúva judío kuéra apytépe. Peteĩ pyharépe oho Jesús rendápe, ha he’i chupe: — Mbo’ehára, roikuaa niko Ñandejára ne mbou
hague ore mbo’e haguã. Péicha’ỹ rire niko nderejapói va’erã mo’ã umi milágro nde rejapóva,
Ñandejára noĩri ramo ne ndive.

Jesús he’i chupe: — Añetéko ha’e hína ndéve, Ñandejára Rréinope ndereike mo’ãi nerenaséi jeýrõ.

Nicodemo he’i chupe: — Mba’éicha piko okakuaapámava onase jeýta. Ikatúta nga’u piko oike jey isy ryépe, upéi onase jey haguã.

Jesús he’i chupe: — Añetéko hína pe ha’éva ndéve. Pe onase pyahu’ỹva, y ha Espíritu Sánto rupi, ndikatu mo’ãi oike Ñandejára Rréinope. Maymáva onaséva ko yvy ári niko, itúva ha isy.

Umi onaséva Espíritu Sánto rupi katu, Ñandejára ra’y hína. Ani eñemondýi ha’e haguére ndéve opavave onase jey va’erãha. Yvytu niko oipeju, oipejuseha gotyo. Ha rehendu ramo jepe, nderehechái moõguipa ou térã moõpa oho. Upéicha hína umi onase pyahu jeýva Espíritu Sánto rupi.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

“Péicha guarãntema che”. He’i upérupi ndohejaséiva ilája vai. “Yvyra karẽ okakuaapa rire ndaikatuvéima opu’ã porã”. Oimémane he’íva ichupe hi’ári. Ha péicha avei ja’e ñande jehe jahecha pype ñañeha’ãramo jepe, nañasẽiha ñande guata tujágui.

Ha’ete ku jajere jere ha apete jeýnte ñasẽva, térã katu kavaju tujáicha upe ñande rape jajepokuaa hárupi mante jaguata ha upégui nañasẽi. Ha péichape jaju ñande ave ñapensa ha
ja’e: Nambre, péicha guarãntema che, péicha guarãntema ñande, nañane pohãi, rei ñañeha’ã
ha jajepy’apy. Oikóvantema oikóta.

Ha oiméko añete umi mba’e ndaikatuvéimava jaguerova ha ñamoambue, ñamboguata va’erãva ha jaiko heseve. Hesu katu he’i ikatuha Espíritu Santo rupive jaikove pyahu jevy, ñanase jey. Ha upéva nde’iséi jaike jey ñande sy ryépe, upéva Ñandejára pu’aka rupi oiko. Jajeroviáramo Hesúre ha jahejáramo ha’e ñane sãmbyhy ha oike ñande rekovépe, ñaneñe’ẽ rendúramo ichupe ikatu oiko ñande hegui kuimba’e pyahu, kuña pyahu.

Mba’épa reñandu che irũ ha nde che reindy. Mba’épepa ehecha péicha guarãntemaha, ha mba’épe eikotevẽ ha eipota Ñandejára ombopyahu nde rekove Espíritu Santo rupive.

Pa’i Alberto Luna.