Ñahendu Hesu. Lunes Santo

Escucha el evangelio y la reflexión en: https://youtu.be/frizyYLZMb8

Lunes Santo

Juan 12, 1 – 11

Páskua arete mboyve 6 arahápe, Jesús oho Betániape, Lázaro oikohápe, ku ha’e omoingove jey va’ekue rógape. Upépe, peteĩ pyhare, ijatypa puebloguáva osena haguã Jesús ndive. Marta ogueroja tembi’u hamba’e mesápe, ha Lázaro katu oguapy hína mesápe Jesús ndive.

Upéi katu, María ogueru peteĩ nárdo ryru hyakuã porã ha hepýva ha oñohẽ Jesús pýre. Upéi katu omokã umi ipy hi’ávape. Ha upe perfúme ryakuãngue omyenyhẽmba pe ogapy.

Upépe, peteĩ Jesús disípulo hérava Judas Iscariote, ku upéi otraisiona va’ekue Jesúspe, osẽ he’i: — Iporãve vaerã mo’ã niko ñavende mba’e ra’e péva ha hepykuépe ñaipytyvõ mboriahúpe.

Júdaspe niko ndoúi térã ndohói hapicha mboriahu. Chupe niko platamínte omokyre’ỹ. Ha’e va’ekue pe oñongatúva pláta oiporúva jepi hikuái, ha tapére omondáva voínte oikóvo imba’erã.

Jesús osẽ he’i chupe: — Ani epena Maríare. Topyta chupe kóva mandu’arãrõ ágã añeñotỹrõ guarã. Mboriahu niko oĩtante voi pende apytépe opa ára, che katu nahániri.

Oĩ ra’e heta ohendúva Jesús oĩha hína Betániape. Upévare, oho hikuái upépe ohecha haguã Jesúspe ha Lázarope ave, ku Jesús omoingove jey vaekuépe.

Upépe, umi pa’i ruvichakuéra oheka mba’éichapa ikatúne ojuka Lázarope. Jesús omoingove jey haguére chupe niko, heta oĩ umi ojehejáva chugui kuéra ha ojeroviáva Jesús rehe.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ñandejárape ha mboriahúpe jahejáva jepi pe hembývante. Ágã jajapopa rire ñane rembiapo ipa’ũ ramo ñandéve ñañembo’éne térã jaha tupaópe. Pe níkel ñande gueltokue ñame’ẽne mísa hápe. Tembi’u hembýva, ao ndajaiporuvéiva ñame’ẽne mboriahúpe.

Ápe jahecha María, Lázaro reindy, oraha peteĩ perfume ryru hepýva ha oñohẽmbaite Hesu pýre. Ha pe hyakuã ojagarrapa pe óga. María ohechauka mborayhu tuicha orekóva Hesúre, ndaha’éi tembyrénte oraháva chupe.

Oiméma katu ipochýva upévare. Judas he’i mba’érepa noñevendéi umi iplata hetávape ha hepykue oñeme’ẽ sa’i sa’i mboriahúpe.

Hesu katu he’i oheja haguã, iporãha pe ojapóva. Tekotevẽ Ñandejárape ha mboriahúpe ñame’ẽ avei umi mba’e iporãva. Ani ñambotapykue, ani ñanerakate’ỹ ñame’ẽ haguã pe iporãvéva jarekóva, pe hepyvéva Ñandejárape ha ñande rapichápe.

Hesu ovy’a ha oguerohory ñañeme’ẽramo chupe ñande py’aite guive ha tuicha háicha, ñambyasy’ỹre pe ñame’ẽva. Ha’e he’i tuichaiteve hekoviataha ñandéve uperire.

Mba’épa oñanduka ndéve che irũ ha nde che reindy ko María ojapo vaekue Hesu rehe. Ema’ẽmína nde rekovére mba’eichaitépa oime hína ehechauka mborayhu ha eme’ẽ nde jehegui nde rapichápe ha Hesúpe avei.

Pa’i Alberto Luna.