Ñahendu Hesu. Lunes V de Cuaresma

Escucha el evangelio y la reflexión en: https://youtu.be/m5pNPaQpI8g

Lunes 5º Cuaresma Ciclo A y B

Juan 8, 1 – 11

Upérõ Jesús osẽ oho Monte Olívospe. Ko’ẽmbávo, oho Tupaópe ha heta oĩ umi oñembojáva hendápe. Upémarõ oguapy ha oñepyrũ ombo’e chupekuéra.

Upe jave umi Moisés léi ombo’éva ha fariséokuéra ogueraha hendápe peteĩ kuña ojejuhu va’ekue omyakãratĩrõ iménape. Omoñembo’y hikuái imbytépekuéra, ha he’i Jesúspe: -Maéstro, ko kuña niko ojejuhu omyakãratĩha iménape. Moisés léipe niko he’i ãichagua kuña oñembo’ita va’erãha omano meve. Ndéiko mba’e ere.

Péicha niko ou oporandu hikuái Jesúspe ombopakova pireségui chupe hikuái. Ha upéi omoĩ vai haguã chupe poguasu kuéra renondépe. Jesús katu ojayvy ha ikuãme oñepyrũ ohai pe yvýre. Ha oporandu jey-jeýre chupe hikuái, oñakã rapu’ã ha he’i chupekuéra:— Oime ramo pende apytépe ipecado’ỹva hína, upéva raẽve tojapi chupe itápe.

Upéi katu ojayvy ha oñepyrũ jey voi ohai pe yvýre. Ohendúvo hikuái upe Jesús he’i va’ekue, peteĩ-teĩ oñepyrũ ohopa hikuái, umi itujavéva tenondete. Jesús opyta ha’eño pe kuña ndive, ha oñakã rapu’ã oporandu chupe: — Moõiko ohopa hikuái che áma.

Ndaipóri véima piko nde jukaséva. Pe kuña he’i chupe: — Nahániri karai.
Jesús he’i chupe upémarõ: — Che ave ndaipotái remano. Tereho, ha anivéma péicha
rejapo.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Jaikuaa niko oĩha ñande rapicha ojavýva, hembiapo vaíva ha ojepilláva, omondáva, ojavykýva imba’e’ỹva rehe… Jahecha ojereraha préso, osẽ diáriope, télepe jahecha ñande rapicha otĩgui oñemo’ã ani haguã ojekuaa hova.

Hesu renondépe ojereru peteĩ kuña ojepilláva omyakã ratĩha iménape. Kuñánte ojereru, ndojeguerúi pe kuimba’e oporomoakãratĩva hendive… Pepe voi jahecháma noñombojojaiha umi hembiapo vaíva. Kuña apérente ojeityse mokõive rembiapo vaikue.

Hesu oñembotavy chugui kuéra oñandúgui pe léi ojeityseha pe kuña ikangyvéva apérente, ha péva naiporãi. Amo ipahápe katu he’i chupe kuéra, upe nahembiapo vaíriva ikatuha ojapi itápe hapicha ojavývape.

Upépe ojechakuaa naipotĩriha avei hikuái, oñakãity joa ha ogue upégui.Pe léi niko ñaikotevẽ ramo jepe, ndaha’éi ohundi haguã pe ojavývape. Péva oñemoĩ ojoko haguã tembiapo vai. Pe léi oipytyvõ vaerã avei ñande rapicha osẽ haguã upégui. Ndaha’éi oho haguã ituju kárselpe ha oñembyaive upépe osẽ rangue ivaívagui.

Hesu ndohovasái pe léi oporojukáva. Oje’éva “pena de muerte”. Oipe’áva hekove pe ojavývagui. Jaiporiahuvereko vaerã ñande rapicha ojavývape ikatu haguãicha opu’ã jevy, ohechakuaa hembiapo vaikue ha oikove jevy tape porãre.

Ha upéi ave che irũ ha nde che reindy, ñande avei niko ñane kangy, jareko ñande fálla ha ñañeha’ã jaikóvo ñapu’ã ha ñasẽ ivaívagui. Jahechakuaa va’erã avei ñande rapicha ojavývape, jajerovia hese ikatuha osẽ ha ñaipytyvõ iporãve haguãicha.

Pa’i Alberto Luna.