Ñahendu Hesu. Martes II Durante el Año

Escucha el evangelio y la reflexión en:

Martes 2 Durante el Año

Marcos 2, 23 – 28

Peteĩ sábado árape Jesús ohasa ohóvo kokue rupi. Ha idisípulokuéra oñepyrũ oipo’o trígo ha ho’u. Umi fariséo he’i chupe: Ema’ẽmi, nde disípulo kuéra niko ojapo, ojejapo’ỹ arã pytu’uha árape.

Ha’e katu he’i chupekuéra: Ndapeikuaái nga’u piko mba’épa Ñandejára Ñe’ẽme he’i, David ojapóva iñembyahýiramo guare, iñirũnguéra ndive. Oike hikuái Tupaópe, Abiatar pa’i guasúrõ guare, ha ho’u umi pan Tupãme oñemboyke vaekue ha pa’ínteva ikatúva ho’u, ha ome’ẽ avei iñirũnguérape.

He’i avei chupekuéra: Sábado árako ojejapo vaekue yvypórape guarã, ndaha’éi yvypóra sábado árape guarã. Upéicha hína, ko kuimba’e oimégui ára sábado ári.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Pe ñaikotevẽ ha ndajarekói ningo tuicha mba’e. Hesu ha iñirũnguéra ohasa avei tekotevẽ. San Marco omombe’u ñandéve Hesu ha ijapóstol kuéra iñembyahýi hague, ha upémaro ipojái hikuái hapicha ñemitỹnguére ohasávo kokue ykére.

Ha oĩma opilláva ha ojaguáva hese kuéra. Hesu katu omombe’u chupekuéra Rey Davi rembiasakue, iñembyahýi ramo guare ave ha’e ha iñirũ nguéra. Mba’éicha ipojái hikuái imba’e’ỹva rehe, ha ojavyky hikuái pa’i kuéra rembi’úre, oĩva tupaópe avave ikatu’ỹva ojavyky.

Hesu ombo’e chupekuéra Ñandejára peguarã pe tapicha oikotevẽva rekove oĩha léi ári. Ha pe máva ohasa asýva ñembyahýigui, omanótaramo ndorekóiramo ho’u va’erã, ikatuha ipojái ambue mba’ére ha ho’u, taha’e jepe ra’e tupao mba’éva.

Upe omanótava tekotevẽgui ojavykýramo imba’e’ỹva, upéva nomondái. Oiporúnte hina hapichágui osalva haguã hekove. Ha ndépa che irũ ha che reindy mba’éichaite hína rehecha ha reñandu kóva.

Pa’i Jasy.