Ñahendu Hesu. Martes III de Cuaresma

Escucha el evangelio y la reflexión en: https://youtu.be/SPZnbkotuRM

Martes 3º Cuaresma

Mateo 18, 21 – 35

Upérõ Pedro oñemboja Jesús rendápe ha he’i chupe: — Maestro, oime ramo hembiapo vaíva che ndive piko mboy vése aheja rei vaerã chupe. 7 piko iporãma.

Jesús katu he’i chupe: — Nahániri. Ndaha’éi 7, 77 jo’a jo’a uvei.
Kóa ko káso ohechaukáta peẽme mba’éichatapa hína Ñandejára Rréino. Oiko va’ekue
ndaje raka’e peteĩ mburuvicha oikuaaséva mboy-mboýpa odeve chupe umi omba’apóva
chupe. Iñepyrũme voi, ojegueru hendápe peteĩ millóne odevéva chupe. Ha isoguégui,
ndaikatu mo’ãiva omyengovia mba’eve.

Huvicha upémarõ he’i ovendetaha chupe tembiguái ramo ta’ýra kuéra ha hembireko ave, ha upéva ári opa mba’e oguerekóva. Pe hepykue opytáta chupe upe oiporu vaekue rekovia. Upépe, pe kuimba’e oñesũ huvicha renondépe ha ojerure asy chupe: “Che ruvicha, ndikatúi piko che ra’arõ’imive.

Amyengoviáta niko ndéve pe aiporu vaekue.” Ha huvicha oiporiahuvereko chupe.
Oheja rei chupe pe odevéva, ha oheja oho.

Ha ha’e osẽvo okápe katu, ojuhu hapichápe oiporu vaekue chugui pláta michĩ ra’ymi.
Opo voi hese ha oityvyro chupe, he’ívo: “Emyengovia chéve pe redevéva.” Hapicha oñesũ henondépe ha ojerure asy chupe:

“Ndikatúi piko che ra’arõ’imive. Amyengoviáta niko ndéve pe aiporu vaekue” Ha’e katu ndoikuaaséi chugui mba’eve. Oguerahauka préso omyengoviapa peve pe oiporu va’ekue.

Umi hapicha ohechávo upéva, ipochypa. Oho hikuái mburuvicha rendápe ha omombe’u chupe mba’épa ojehu.

Upémarõ pe mburuvicha ohenoika pe kuimba’épe ha he’i chupe: “Ne aña ra’y reikóva. Che niko aheja .rei ndéve pe ikatu’ỹ va’ekue remyengovia chéve, rejerure haguére. Mba’éicha piko nde, nderehecha kuaái nde rapichápe, che ajapo haguéicha ne ndive.”

Ha pe mburuvicha ipochy’eterei opytávo. Upémarõ ombyepotiuka omyengoviapa
peve upe chupe odevéva.

Upéi Jesús osẽ he’i: — Péicha avei ojapóta pende rehe che ru yvágape oĩva pende
py’aite guive ndapeheja reíri ramo pende rapichápe pe ivaíva ojapóva pende rehe.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ajépa ningo che reindy ha nde che irũ, ijetu’u jaheja rei haguã ñande rapichápe ojapo vaíva ñande rehe. Ombojo’ave ramo hembiapo vai katu hasyvéntema jajejoko ani haguã ñambohovái ha ñambogue pochy ilómo pirére mba’e, ha jaikuaauka avei chupe.

Ñandejára katu oheja rei jey jey ñane rembiapo vaikue ikane’o’ỹre. Ha omyengoviáta rire ñandéve peteĩ teĩ, ymáma ñañehundi va’erã mo’a. Hesu he’i ñande jajapo va’erãha ñande rapicha ndive Ñandejára ojapo háicha ñanendive, hetaite ára rasáma ñandeporiahuvereko ha oheja reíva ñane rembiapo vaikueta.

Pa’i Alberto Luna.