Ñahendu Hesu. Lunes Semana 18a TO
3 agosto, 2020Ñahendu Hesu. Miércoles Semana 18a TO
5 agosto, 2020
Escucha el evangelio y la reflexión en: https://youtu.be/pMXaToPrzGw
Martes 18a TO. Ciclo A
Mateo 15, 1-2. 10-14
Oñemboja Jesús rendápe Fariséo kuéra ha umi Moisés ley ombo’éva oúva Jerusaléngui. Oporandu hikuái Jesúspe:
— Mba’ére piko nde disípulo kuéra ndojapói hekópe umi mba’e ñande ypykue ñane mbo’e vaekue ymaite guive. Ndojepohéiri niko hikuái okaru hag̃ua hamba’e.
Upéi Jesús ohenói opavavépe, ha he’i chupekuéra:
— Pe che rendúke opavave, jahecha nahesakãipa peẽme ko ha’étava. Ndaha’éiko tembi’u ñande juru rupi oikéva pe ñane mongy’áva Tupã renondépe. Nahániri. Ñande juru guasúrõ ha ja’érõ ja’e’ỹ vaerã, umíva hína umi mba’e ñane mongy’áva.
Upépe, discípulo kuéra oñemboja Jesús rendápe, ha he’i chupe:
— Umi Fariséope ndo’a porãi upe ere vaekue hesekuéra.
Jesús he’i chupekuéra:
— Opa yvyra máta che Ru yvagapegua oñotỹ’ỹ vaekue, ojehapo’óta. Pejeheja umi fariséogui. Ha’ekuéra niko oisãmbyhy hesatũvape ku ha’ekuéra ohechárõ guáicha. Ha hesatũva oisãmbyhy ramo hesatũvape niko, mokõivéva ho’áne yvykuápe oñondive.
Ñandejára Jesucristo ñe’ẽ
ÑAMBOGUEJY ÑANDE REKOVÉPE
Oime niko ñande rapicha tupaogua, movimiento ha parroquia rupi sapy’ánte jajuhu iléi etereíva voi. Péicha ha péicha mante ejapo vaerã, ha ha’e he’i háicha ndéve nde rejapóiramo katu ombovaíma nde hegui, ha he’íma voi Ñandejárape péicha ndogustái. Ha sapy’ánte vyrésare ojepy’apy ha oiko vai hapicha ndive.
Ko’ápe ñahendu umi fariséo itupao rayhu etéva ou oja’o Hesu disípulo kuérape ndojepohéi haguére okaru mboyve. Upéicha ningo he’i hese kuéra hína ipuerkoha. Ha ohóma katu ojagua Hesúpe idisípulo kuéra ndojapói haguére umi hudío ymaite guive ojepokuaa háicha hamba’e. Ha Hesu ohechakuaa hese kuéra ndouiha py’a porãme, oúnte oheka hikuái mba’éichapa omoĩ vaíta Hesúpe ha idisípulo kuérape. Otopasénte voi hese kuéra oime raẽ vyrésa noiporãiva oapo’i ha oheja vai haguã hapichápe.
Ha upévare ningo Hesu he’i hese kuéra hesatũha. Noma’ẽigui hapicháre py’a porã ha mborayhu reheve, noñembojái oipytyvõ haguãicha, oúnte ombovai ha omohũ haguã umi ndojapóiva ha’e kuéra he’i haichaite ha ojepokuaa háicha. Umívagui iporãvente jajehejaite voi, che irũ ha che reindy. Ani haguã jaha ja’a hendive kuéra avei yvykuápe, he’i háicha Hesu.
Pa’i Alberto Luna.