Ñahendu Hesu. Ñandejára mimbipa ára

Escucha el evangelio y la reflexión en: https://youtu.be/AHGZ3t3uYpo

6 agosto: Ñandejára mimbipa ára.

                                            Mateo 17, 1 – 9.

Upérõ Jesús ogueraha Pédrope, Santiágo ha tyvýra Juánpe, ha ojupi hikuái peteĩ sérro ru’ãme. Upépe, henondépe kuéra, Jesús rete iñambue ohóvo. Hova oñepyrũ omimbi kuarahýicha, ha umi ijao katu morotĩ sakã ha ojajaipa. Peichaháguinte katu ohecha sapy’a hikuái Moisés ha Elíaspe, oñemongetáva hína Jesús ndive. Upépe Pedro osẽ he’i Jesúspe:

— Mbo’ehára, ajépa iporãite ñaimembáre ko’ápe. Reipotárõ, na torojapo peẽme mbohapy kuarahy’ã pene rendaguã, peteĩ ne mba’erã, peteĩ Moiséspe g̃uarã, ha peteĩ Elíaspe g̃uarã avei.

  Pedro oñe’ẽ aja hína katu, ou peteĩ arai omimbipáva ha ojaho’i chupe kuéra. Pe araígui oñehendu he’íva:

— Kóva hína che ra’y ahayhuetéva, che mbovy’áva. Pejapo ha’e he’íva peẽme.

  Idisípulo kuéra ohendúvo upéva, ojeity yvýpe kyhyjepópe. Jesús katu oñemboja, opoko hesekuéra ha he’i: — Pepu’ã, ani pekyhyje.

  Ha opu’ãvo, ndohecha véima hikuái avavépe. Jesús ha’eñóntema oĩ.

  Oguejývo ohóvo hikuái pe sérrogui, Jesús he’i chupekuéra: — Aníke pemombe’u avavépe ko pehecha vaekue, aikove jey peve omanóva apytégui.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

            Rehendúvapa, che reindy ha nde che irũ, pe purahéi Teodoro S. Mongelós rembiapo kue, hérava “Che reindy kuña koygua”. Upépe ningo ha’e he’i pe kuña okarayguápe: “Araka’émo avei nde po’a heñói ko’ẽ ha nde pojáivo yvate rembopoty pe arai. Ha opa maymáva rei tahovayva nde rehe ha pe ñasaindy rangue yvy ha yva remimbi.” 

            Ha he’i ningo avei karai Mongelós pe kuña okarayguápe: “Ikoe chéve hasy ahechávo rehasa, tuicha ne akã arigua ha nde ry’ái esyry”.  Ha’ete la ñande avei ajépa, jahupíva ñane akã ári heta mba’e, ha sapy’ánte avei ñande ry’ái jasyry. Ha ndaipóri oumíva “omokã ñande syvágui pe jukyry”. He’i háicha pe purahéi. Ñande jey mante ñamokãta ñande ry’ai kue, japytu’u imi ha jahupi jey ñane akã arigua ha jaha hese.

            Angete ñahendu Hesu oraháramo guare Pedro, Santiago ha Juan pe hendive. Ojupi hikuái peteĩ sérro yvate. Ha upépe Hesu ohechauka ichupe kuéra mimbipápe mba’éichapa ojajái pe hóva ha ijao, ha ohendu hikuái Ñandejára ñe’ẽ jepe. Yvágare ipojái hikuái sapy’ami. Ha vy’águi rei niko Pedro osẽ he’i: Japytána ko’ápe, jajapo ñande rogarã.

            Ha oguejy jey mante hikuái oñondive. Ha’ete ku Hesu oñandukáva ichupe kuéra michĩmi pe yvága ryakuã. Oikuaa ha imandu’a haguã ha’e kuéra Hesu añetehápe ha’eha Ñandejára ra’y. Ha hendive oguatáramo, jepevéramo ohasa asýta, ipahápe yvágare ipojaitaha.

Pa’i Alberto Luna.