Ñahendu Hesu. Martes Semana 20º TO

Escucha el evangelio y la reflexión en:

Martes 20a TO.                   

                                                              Mateo 19, 23 – 30.

  Upérõ Jesús he’i idisípulo kuérape: — Añetéko ha’e peẽme, hasy niko umi imba’e retávape oike haguã Ñandejára Rréinope.   Ha’eve katu peẽme. Ndahasyive vaerã ñambohasa ju resa rupi kavaju, irríkova oike rangue Ñandejára Rréinope.

  Idisípulo kuéra ohendúvo upéva opondera joa hikuái, ha he’i:

— Péicharõ piko máva ojesalváta.

  Jesús katu oma’ẽ hesekuéra ha he’i: — Yvypórape ijeheguínte, ndaikatúi.  Ñandejárape guarã katu ndaipóri mba’eve ikatu’ỹva.

  Upémarõ Pedro he’i chupe:

— Ore niko rohejapa opa mba’e ndéve romoirũ haguã. Mba’éiko rohupytýta ore.

  Jesús he’i chupekuéra: — Añete ha’e peẽme, ágã oguãhẽvo pe ára opa mba’e oñembopyahupa jeývo, che aguapýta umi arai mimbipápe. Ha peẽ che moirũ vaekue katu peguapýta 12 arai ári pemoĩvo hendaguãme umi 12 Israelgua ñemoñarépe.   Ha opa umi oheja vaekue hóga térã ityvýra, térã iteindýra, térã itúva, térã isy, térã hembireko, térã ita’ýra, térã ijyvy che rehehápe, pe peteĩ oheja vaekue rendaguépe ohupytýta 100. Ha ohupytýne ave jeikove opa’ỹva.   Ha heta umi ko’ágã itapykuéva, tenondete oguapýta. Ha umi ko’ágã itenondéva, itapykuéta.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

“Mba’e ja’éta si la omandáva tova atã ha kasõ potĩ”. He’i ningo peteĩ compuesto yma guare.  Ha heta niko ñahendu ha jahecha téle ha rádio ha oparupiete ñanemo kyre’ỹ ha ñanembo túliva jaiko haguã mba’eta rapykuéri, ñambyaty haguã pláta, ñande rríko, ñane tenonde, jajecha ramo, ñañemomba’e guasu, ha umíva jahupyty ramo jarekotaha vy’a pave.

Hesu katu he’i iñirũ nguérape umíva rapykuéri oikóramo ndaikatu mo’ãiha oguata avei hendive, ndaikatúi omoirũ Hesúpe oiko ramo upe jave omuña mba’e reta. Péva ningo ijetu’u eterei, osẽ he’i ichupe hikuái. Máva piko péva ogueropu’akáta.

Oiméne ñande ñande rricoséva avei, ñañandu pe oñandu háicha apóstolkuéra, nañandepu’aka mo’ ãiva váicha ko karréta rehe. Hesu katu nombotýi okẽ ha upéva ñanembopiro’y imi. He’i:  “Yvypórape ijeheguínte, ndaikatúi.  Ñandejárape guarã katu ndaipóri mba’eve ikatu’ỹva”.

Ñañemoĩma ningo tapépe che reindy ha nde che irũ.  Jajepokã Hesúre ñande rekovépe, jajerovia hese. Ñañemoarandu Ñandejára ñe’ẽme, ñañembo’e ha jaguata oñondive, ñañeha’ã ñamongakuaa mborayhu ha py’a peteĩ ichugui oúva. Ñande ikatu’ỹva jaheja ipópe. Ha jahupyty ramo upe ñaikotevẽva iporãma, ani ñande taryrýi ñambyaty haguã mba’eta ikatu’ỹ vaerã jaiporupa ñande rekovépe.

Pa’i Jasy.