Ñahendu Hesu. Miércoles 18º Durante el Año

Escucha el evangelio y la reflexión en: https://youtu.be/QVClm3-SD6k

Miércoles 18º Durante el Año

Mateo 15, 21 – 28

Upérõ Jesús osẽ Genesarétgui ha oho oiko Tíro ha Sidón jerére. Ha peteĩ kuña Canaangua, upe rupigua, oñemboja Jesús rendápe. Osapukái chupe:— Karai, ndéko hína ku Mesías. Che poriahuverekóna. Che membykuña niko oĩ demóño poguýpe, ha oguereko vai eterei chupe.

Jesús katu nopenái hese. Upémarõ idisípulo kuéra oñemboja hendápe, ha he’i chupe:— Ehechána mba’épa oipota pe kuña. Osapukái niko oúvo ñande rapykuéri.

Upépe Jesús he’i chupekuéra: — Ñandejára niko che mbou Israelguápente. Umíva niko ku ovecha herekua’ỹvaicha oiko.

Upe jave katu pe kuña oguãhẽ ha oñesũ Jesús renondépe, ha he’i chupe:— Karai, che pytyvõna.

Jesús he’i chupe: — Na’iporãi niko jaipe’a mitã jurúgui tembi’u ha ñame’ẽ jaguápe.

Pe kuña katu he’i chupe: — Añete niko pe eréva. Péicharõ jepe, jaguánte avei niko
ho’u pe tembi’u rembyre ho’áva ijára meságui.

Upémarõ Jesús he’i chupe: — Tuichaite piko rejerovia che rehe. Pévare, toiko ndéve
pe rejeruréva. Ha upete jave okuera imemby kuña.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Mitã hasy vove niko pe sy, térã aguéla pe oikovéva oñangareko hese. Ou ha oho, oheka ha ojapo pohã, oraha hospitálpe, oipohano, ojapichy, oñembo’e hese hamba’e.

Peteĩ kuña ndaha’éiva Israelgua oñemboja ojerurévo imemby kuña hasýva rehe, Hesu omonguera haguã. Hesu katu nopenái hese tenonderã.

Umi apóstolkuéra katu omosẽse voi ichupe upégui. Kuña ningo oñemboykéva voínte ymaite guive ha ko’ýte kóva ko kuña ndaha’éiva judíokuéra rehegua. Kóva ko kuña katu ndoguevíri ha ou ohenonde’a Hesúpe, oñesũ voi henondépe ha ojerure ichupe oma’ẽ haguã hese pe imemby rehehápe.

Hesu oñe’ẽ pohýi imíramo jepe ichupe, pe kuña nosẽi upégui ha ojerure jevy jevy ichupe oipohano haguã imembýpe. Upépe ohechágui tuichaha pe kuña jerovia Hesu ome’ẽ ichupe pe ojeruréva. Ipu’aka hese ko sy imemby rayhupápe ojerure asýva.

Ko kuña py’a guasu ñanembo’e ñandéve che reindy ha nde che irũ, ñañorairõ va’erãha ojehechakuaa haguã ñandéve ñane remikotevẽ hekoitépe guáva.

Ñamyangekói va’erã Ñandejárape jepe, ha ñande rapicha kuérape avei jaguevi’ỹre, jajehova apíramo jepe, jahupyty peve pe ñanemba’éva. Jajerovia vaerã ikatuha japoko Ñandejára ha ñande rapicha py’áre ohechakuaa ha ome’ẽ haguã ñandéve upe ñande derecho, ha upe ñaikotevẽva.

Pa’i Alberto Luna.