Ñahendu Jesús Ñe’ẽ. Miércoles Epifanía rire

Escucha el evangelio y la reflexión en: https://youtu.be/sBLw57XSbio

Miércoles Epifanía rire San Marcos 6, 45-52

Omongaru rire cinco mil kuimba’épe hyguatã meve hikuái, Jesús he’i idisípulokuérape ojupi haguã peteĩ kanóape ha ohasa haguã henonderã lágo mboypýri, Betsaida gotyo.

Upe aja ha’e he’íta opavavépe oho haguã hógape. Omondopa rire opavavépe hógape, Jesús ojupi peteĩ sérrope oñembo’e haguã. Pyhare oguahẽvo, pe kanóa ohupytýma pe lágo mbyte rupi. Pe y pochy katu oñenupã pe kanóa tĩre, ohuguãitĩgui ohóvo hikuái yvytu atã, ha ohecha umi kanóa pegua oho mbegueha, yvytu ojokógui chupekuéra.

Ko’ẽ mbotávo, Jesús oñemboja hendápekuéra oguatahápe pe y apére. Ha oñemotenondese hesekuéra. Umi disípulo ohechávo oguataha pe y apére, oimo’ã hikuái póra, ha osapukái, opavave ohechágui chupe ha oñemondýi. Jesús katu pya’e oñe’ẽ chupekuéra he’ívo: Chénteko, ani pekyhyje!

Ojupi kanóape ha opi pe yvytu, ha ha’ekuéra ijurujái opytávo, ndoikéigui iñakãme pe milagro pankuéra rehegua, iñypytũ ichugui kuéra ipy’a.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

“Ndaikuáai ojehúva chéve che ko’ẽnte sapy’a che ygue ygue rei, imposible ndavy’aí”. He’i ningo peteî purahéi Emiliano-re. Ha ou sapy’ánte añete ho’a ñande rehe pytũ. Ñakañy vaicha ha mba’eve nde’iséi ñandéve. Nañanderetia’éi mba’everã ha ñande aho’i vy’a’ỹ. Mombyry vaicha oĩ ñande hegui Ñandejára upéicha jave.

Ñahendu kuri pytũ riréma umi apóstolkuéra opyta kanóape y mbytépe ha’eño. Jesús ndaipori hendivekuéra. Ha ou peteĩ yvytu ne ratãva háime ombojeréva pe kanóa ouha hikuái. Hendy kavaju resa. Ha mba’érepa upéicha ou ñande ári umi ára pohýi. Mokõi mba’ére e’i San Ignacio: Tenonderã ikatu ñande voi ñambohape jeiko asy ñande fayuto-gui.

Ndajajapóigui hekópe upe Ñandejára omoĩva ñande pópe, ha jahechápa upéicha ndajajetyvyrói ha ñamyatyrõ ñande rekove. Ha upéi, he’i San Ignacio, ikatu ave Ñandejára voi oheja jahasa asy, jahechakuaa haguã ñande ndaikatuiha ñamoĩ térã jaipe’a vy’a térã vy’a’ỹ ñande py’águi.

Upéva Ñandejára mante ikatu ojapo. Ipahápe ningo Jesús ou kuri oipytyvõ iñirũ nguérape. Oipe’a apóstolkuéra kanoa’i pe y pochýgui ha ombopy’aguapy ichupe kuéra. Mba’épa nde reñandu che reindy ha che irũ nembopy’a kangy ha nemongyhyjéva ko áño pyahúpe.

Mba’eichagua y pochýpa nde rypýi ha nemoñapymise hína. Ani ekyhyje he’i Jesús. Eho rei katu hese ne kanoa’ípe, eikuaa pype Jesús ohasataha hína ne pytyvõ ha nembopy’aguapy ágãite agãvépe.

Pa’i Jasy.