Ñahendu Hesu. Miércoles Semana 30ª TO

Escucha el evangelio y la reflexión en: https://youtu.be/zMMsH3o476k

28 octubre: Simón ha Judas, apóstolkuéra

Lucas 6, 12 – 19

Umíva umi árape, Jesús ojupi peteĩ sérro ru’ãme oñembo’e haguã. Ha pyhare pukukue
opyta upépe. Ko’ẽ rire ohenói umi idisípulope hendápe, ha oiporavo 12. Umívape ohenói apóstol. Umíva hína: Simón, Jesús ombohéra vaekue avei Pedro, ha tyvýra Andrés.

Upéi oĩ Santiágo, Juan, Felipe, Bartolomé, Mateo, Tomás, ha Santiágo, Alféo ra’y. Avei Simón, Selóte oje’eha, Judas, Santiágo ra’y; ha ipahápe Judas Iscariote, ku upéi otraisiona vaekue Jesúspe. Jesús oguejy idisípulokuéra ndive pe sérrogui, ha opyta hikuái ñúme. Oñembyatypa ra’e upépe umi hapykuéri oikóva.

Heta avei oĩ oúva Judéagui, Jerusalén, Tíro ha Sidóngui. Ou ra’e hikuái ohendúvo Jesúspe, omonguera haguã chupekuéra imba’asýgui. Umi demóño po guýpe oikóva okuerapánte avei.
Maymávante opokose Jesús rehe, oikuaágui pe pu’aka osẽva chugui omonguerataha
chupekuéra.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Oime niko ñande apytépe heta tapicha katupyry, oikóva ojapo hembiapo kirirĩ hápe, imba’e porãva, ojeroviáva ha oipytyvõ hapichápe. Oime oñembo’éva, jahecháva tupaópe, organización pe hamba’e, ideprovéchova hapichápe. Ha ndaha’éi la ojekuaa guasúva, hyapúva, osẽva diáriope, térã odiskurseáva, oñe’ẽva radio ha télepe hamba’e.

Apóstol kuéra apytépe niko oime kuri mokõi Simón. Peteĩvape Hesu ombohéra va’ekue Pedro, he’iséva ita. Péva la ñande jaikuaavéva hína, Hesu ohejágui ichupe omyakã haguã pe Iglesia iñepyrũmbýpe. Ha upéi oime hína Simón Selóte.

Umi selóte ningo ha’e vaekue guerrilléro oñorairõva omosẽ haguã mbaretépe rrománokuéra tetã Israélgui. Ha Hesu ohenói raka’e Simónpe ojeheja haguã kyse ha lánsagui, ha oñemoĩ
haguã ijykére Ñandejára Rréino oheka ha omoherakuã haguã py’aguapýpe.

Oime vaekue avei mokõi Judas Hesu ohenói va’ekue iñirũra. Peteĩva hína Judas Iscariote, pe plátare oity vaekue Hesúpe umi mburuvicha pópe. Upéva ñande jaikuaa hína ha ñanemandu’a hese otraisiona haguére imaéstrope. Ha upéi katu oime Judas Santiago ra’y, péva sa’ive ñande jaikuaa ha ndahyapu guasúi.

Ko árape niko ñanemandu’a hína Simón Selóte ha Judas Santiago ra’y rehe. Umi mokõi Hesu ohenói vaekue iñirũra ha naherakuã guasúiva, itapykue vaicha umi apóstolkuéra apytépe. Upévare jepe nde’iséi hína ndojevaleiha hese kuéra Ñandejára.

Ha pe komunida oikotevẽ opaichaguáva rehe, ndaha’éi umi ojekuaavéva rehente.
Ha upéicha hína che reindy ha nde che irũ, natekotevẽi ñande famóso, ha opavave ñaneguerochichĩ ha ñandekuaa. Upe he’iséva hína Hesu ñanerenói jaguata haguã hendive ha ñañomoirũ haguã jerovia ha tembiapo porãme ñande rapicha ndive.

Pa’i Alberto Luna.