Ñahendu Hesu. Miércoles V de Cuaresma

Escucha el evangelio y la reflexión en: https://youtu.be/pU4msEUj_rY

Miércoles 5º Cuaresma

Juan 8, 31 – 42

Jesús he’i umi hese ojerovia vaekuépe: — Peẽ pejapo ramo upe che ha’éva peẽme, peẽ che disípulo añetéta hína. Peikuaáta tekove añete, ha upéva pende joráta opaite mba’égui.

Ha’ekuéra katu he’i chupe: — Ore niko Abraham ñemoñare, araka’e piko roikóva avave poguýpe. Mba’éreiko ere rojejorataha.

Jesús he’i chupe kuéra: — Añetéko ha’e peẽme, opa hembiapo vaíva niko oĩ pecádo poguýpe. Ndaipóri niko tembiguái opytáva ijára rógape ijára omano meve. Pe óga jára ra’ýnte pe opytáva. Upévare, Ñandejára Ra’y pende jora ramo pekádo po guýgui, añetehápe pene sãso.

Che aikuaa peẽ Abraham ñemoñareha. Péicharõ jepe, peẽ che jukase ndaperoviáigui che ñe’ẽ. Che amombe’u peẽme umi mba’e che Ru ohechauka va’ekue chéve. Peẽ katu pejapo pende ru he’iháicha peẽme.

Ha’ekuéra he’i chupe: — Abraham niko ore ypykue.

Jesús katu he’i chupekuéra: — Abraham ñemoñare rire añete peẽ, pejapo va’erã mo’ã ha’e voi ojapo haguéicha. Upéva rangue katu, peẽ che jukase amombe’u haguére peẽme ñe’ẽ añetegua Ñandejára he’i vaekue chéve. Abraham nda’upéichai va’ekue. Peẽ pejapo pende ru ojapoháicha.

Ha’ekuéra he’i Jesúspe: — Ore ndaha’éi ta’ýra okára. Peteĩnte ore ru, ha upéva Ñandejára.
Jesús he’i chupekuéra: — Ñandejára pende ru rire, che rayhu vaerã mo’ã. Tupãgui niko che aju, ha ápe aime. Ndajúi che jehegui reínte, Ñandejára che mbou.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Oime niko ñande rekovépe ñanemosã ha ñaneapytĩva. Oĩ umi ñande ndajaiporavóiva, oúvante ñandéve, mba’asýicha mbae. Oĩ avei mboriahu hetápe omosãva, ha he’i háicha ñe’ẽ, oĩ pe tavy, nañandejukái ramo jepe ñande reko asýva.

Oĩ avei umi mba’e vai ñanemosãva ñande voi jaiporavóva, ha’éva vísiokuéra, káña, jepita, dróga, húnta vai, aña, teko tie’ỹ ha mba’e. Hesu he’i pe tembiapo vai, pe ñande pekádo, ñaneapytĩ su’uha. Japúpe ñande reko tembiguáiramo, ñanembotavy, ñanemosã ha oñemboharái ñande rehe. Vaípe ñande reko, ñane rundi peve. Ñanemombyry ramo Hesúgui mbyky ñakañy ha upégui ja’a haguã aña ñuhãme.

Oĩ avei niko umi oñemosã porãva. Hakate’ỹva hógare, hembireko térã iménare, ifamíliare, ikomunidáre. Oñemosãva organizaciónre jeiko porãve rekávo, tupaóre.

Ndaikatúi niko jaiko ñañemosã’ỹre avavére. Tekotevẽ ñame’ẽ ñane ñe’ẽ pe iporã añetévape ha japyta hatã ñane kompromísope ñande rapicha kuéra ndive. Mba’épa reñandu che irũ ha nde che reindy upe nemosãva. Hesu he’i ñane ñe’ẽrendu ramo ichupe ha’e omondohóta umi ñane apytĩva ha jahupytytaha hendive tekove añete.

Pa’i Alberto Luna.