Ñahendu Hesu Ñe’ê. Domingo 1 de septiembre

Ñahendu Hesu Ñe’ê. Domingo 1 de septiembre 

                                               Lucas 14, 1. 7 – 14.

 Peteĩ pytu’uha árape, peteĩ fariséo okonvida Jesúspe oho haguã okaru hendive hógape. Ha opa umi oĩva upépe omaña joa hína Jesús rehe. 

 Jesús ohecha mba’éichapa umi oñekonvida vaekue, tenondete voi oho oguapy. Osẽ he’i chupe kuéra: 

Reñekonvidárõ menda hápe, anítei reho reguapy pe mesa akãme voi. Cháke ikatúne oguãhẽ peteĩ tuichavéva ndehegui.  Ha upe ne konvida vaekue oúne he’i ndéve, “Epu’ãta mante oguapy haguã kóva”. Tuicha ñemotĩ rehasáne. Upéi ave, rehóne eguapy amo huguaitépe. 

    Reñekonvidárõ katu, tereho eguapy amoite huguápe. Ágã nde rechávo pe ne konvida vaekue, oúne he’i ndéve, “Che irũ, ehasána eguapy amo iñakãme”. Upéicharõ, umi oguapýva nde yke rupi, tuicha nembojerovia vaerã.  Umi ojejapo ha oñembotuicháva niko oñemomichĩ vaerã ágã, ha umi heko mirĩva katu oñembotuicháne.  

   Upéi Jesús he’i pe chupe okonvida vaekuépe:

Rejapórõ karu guasu, árape térã pyhare, ani ekonvida ne irũ nguérape, térã nde ryvy ha nde ryke’y kuérape, térã nde rogaguápe ha umi rríko kuéra nde róga jere rupi oikóvape. Ágã upéi, ha’e kuéra ave ne konvidáne, ha péicha repyta porãne hendive kuéra. Nde katu ágã rejapo jeývo, ekonvida umi imboriahúvape, umi ipy chékeva, iñepãva ha umi hesatũvape.  Ha’e kuéra niko ndaikatu mo’ãi ne konvida mba’evépe ha ndaikatu mo’ãi omyengovia ndéve. Ñandejára katu tuicha nde rovasa vaerã ágã opa hekojojáva oikove jeyha árape. 

Ñandejára Hesukrísto ñe’ẽ. 

ÑAMBOGUEJY ÑANDE REKOVÉPE…

            Nañandetapykueséi niko avavégui. Ndajaipotái avave ñande apo’i. Jaipota oñeme’ẽ ñandéve upe ñane mba’éva ha ani ou avave ñande pe’a ñane rendágui. Heta niko ñañeha’ã ñaime haguã upe ñaime hápe, ñañemohenda porã haguã. Opáichavo oiko jepi ñande rehe ñañemoĩ rangue ñane pe rendápe porã, ñañembo tuichaseve ñande rapicha renondépe. Lo mitã okaseáramo hína, pe oñepyrũva ojapíramo peteĩ, uperiregua ojapíma mokõi, ha pe ambueve katu ojapíma mbohapy. Ñañoganamba. 

Hesu katu ñanembo’e iporãve ñañembo tapykue’imi. Ñame’ẽ ñande rapichápe pe ñane renda, jaheja toñe’ẽ, noñe’ẽ porãiramo jepe; jaheja tojapo, ndojapo porãmbáiramo jepe. Ani ñandénte ñaimo’ã jaikuaaha, ñandénte la pelóta jára ha ndajahejái avavépe oike kánchape. Ñañemomichĩramo oñemyengovia tuichavéta ñandéve ipahápe ha ochovi renyhẽta, ñañembotuicha ha ñanetĩ pu’ãramo katu, amo ipahápe ñañakãity ha ñanetĩndýta ñasẽvo. 

Emañamína avei che irũ ha che reindy, noiméipa rekonvida, evisita ha embojerovia umi upéi omyengoviátava ndévepe añónte. Hesu he’i ekonvida, evisita, ha embojerovia haguã avei umi ndaikatúivape ome’ẽ ndéve mba’evete asy. Upépe katu Ñandejára tuicha nembovy’áta ha kakuaa nderovasáta. 

Pa’i Jasy.