Ñahendu Hesu Ñe’ê. Domingo 10 de Noviembre

Escucha la reflexión en:https://youtu.be/HaEsBJy3cbs

Lucas 20, 27-38

Peteĩ árape, saduséo kuéra oho Jesús rendápe. Ha’ekuéra niko ndogueroviái omanóva
oikove jeyha. Upévare he’i Jesúspe: — Mbo’ehára, Moisés niko oheja va’ekue oréve kuatiápe, peteĩ kuimba’e omanórõ hembireko imemby’ỹre chugui, tyvýra omenda va’erãha hembirekorére. Ha upe kuña imemby ramo, pe mitã opyta tyke’ýra ra’ýrõ.

Oiko va’ekue ndaje raka’e 7 kuimba’e ojoryvýva. Pe ijypykue omenda, ha omano ta’yra’ỹre. Upéi katu pe mokõiha, ha pe mbohapyha omenda hembirekorére, omano ha nda’ita’ýrainte avei hikuái. Ha upéicha, oho omenda paite pe kuñáre umi hembyre, ha nda’ita’ýrai avavete. Ipahápe omano avei pe kuña. Ha néi, ág̃a ojeikove jey vove, piko máva rembirekóta hína pe kuña. Omenda paite niko hese umi 7.

Jesús he’i chupekuéra: — Ko yvy ári jaikove aja niko, kuña ha kuimba’e omendáva
voínte. Ha Ñandejára mante niko oikuaa máva-mávapa oikove jeýta. Ha ág̃a upéva
ojehu vove niko ndaipóri mo’ã véima ñemenda. Ndaipóri mo’ãvéima omanóva ave.
Maymáva oikóta Ñandejára ángel kuéraicha, ha Ñandejára mba’éta ha’e kuéra oikove
jey haguére. Moisés voi niko ohechauka ñandéve omanóva oikove jeytaha. Ku jukeri
hendypárõ guare okai’ỹre ykére oĩ ramo guare, niko ha’e he’i va’ekue Ñandejára ha’eha
Abraham, Jacob ha Isaac Tupã.

Ñandejára niko ndaha’éi omanóva Tupã. Ñandejára niko oikovévape Tupã. Ñandejára peg̃uarã niko opavave oikove hína.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Umi omendáva Ñandejára renondépe niko ome’ẽ ojupe iñe’ẽ opyta haguã oñondive omano meve. Upepevénte. Uperiregua ndaikatuvéima he’i mba’éichatapa.

Noimevéima ipópe. Uperiregua opytáma Ñandejára pópe. Ha’e ñanemohendáne oikuaa
háicha, mamo ha máva ndive, ha’e oikuaáta. Ha jajeroviágui ñande rayhuha niko
ñaha’arõ ñanemohenda porãne haguã.

Umi saduséo kuéra oúva oñe’ẽ reity Hesúpe niko ndogueroviái oihã jeikove ñemano rire. Ko’ápe guarãnte ñaime, jahupytýva ha jarekóva ko yvy ári la ovaléva, ha upéi katu opáma ñandéve guarã opa mba’e. He’i hikuái. Ha oime avei ñande apytépe ñande rapicha ko yvy ariguárente oma’ẽva ha oñeha’ãva oisyryku ikatumiha peve ndaipóriramo guáicha uperiregua mba’eve.

Hesu katu he’i ñande rekove osẽva Ñandejára pógui, hendápe jey mante oho va’erã. Pe Ñandejára omoñepyrũ vaekue ha’e jey mante omosã va’erã. Ndaha’e mo’ãi ko ñande rekove ko’ãga guáicha. Oñembopyahúta.

Eroviápa che reindy ha nde che irũ ko nde rekove ko’ãgagua uperire oñemosãtaha iporãvévare Ñandejára ykére. Ha mba’épa nde reha’arõ Ñandejára ome’ẽ ndéve upe reikove jey rire.

Pa’i Alberto Luna.