Ñahendu Hesu Ñe’ê. Domingo 13 de octubre

Escucha la reflexión en

Ñahendu Hesu Ñe’ê. Domingo 13 de octubre

Lucas 17, 11 – 19.      

Jesús ohóvo Jerusalénpe, ohasa Samaria ha Galiléa ojoajuha rupi. Ha og̃uahẽvo peteĩ pueblo’ípe osẽ ohuvãitĩvo chupe 10 lepróso. Mombyrymi opyta hikuái Jesúsgui, ha osapukái chupe: — Jesús, mbo’ehára. Ore poriahuverekomína.

Ha ohechávo chupe kuéra, Jesús osẽ he’i: — Tapeho pejechauka pa’ípe.

Ha oguata jave ohóvo, okuera hikuái. Ha peteĩ, ohecha kuaávo okueraha, ojevy Jesús rendápe ha oguerohory oúvo Ñandejárape. Oho oñesũ Jesús renondépe omboja peve isyva yvýre, ha oagradese chupe. Samariagua nimbo ra’e ha’e. Jesús osẽ he’i idisípulo kuérape:

— Ndaha’éi nga’u piko ra’e 10 umi okuera vaekue. Moõiko ohopa hikuái. Ha mba’eichakue piko ko mombyryguávante pe oguerohorýva Ñandejárape.

Ha ojere he’i pe kuimba’épe: — Epu’ã tereho. Che rehe rejerovia haguére rekuera.

Ñandejára Hesukrísto ñe’ẽ. 

ÑAMBOGUEJY ÑANDE REKOVÉPE… 

            He’i ningo Emiliano purahéi: “Llena el alma de suspíro aseguíta che rape, adio che vy’a hague, adio lugar preferido. Oguahẽ el tiempo cumplido rohejávo katuete, ndahaséiramo jepe, el destino che obliga”. Ha pevaite ningo oiméne oñandu Hesu raka’e oguatávo hapére, oho Jerusalénpe. Oñandúgui Ñandejára ohenoiha ichupe upépe. Oheja upe oime porãha ha oike ijetu’uhápe. Oike karaguatatýpe. Jerusalénpe oha’arõ ichupe kurusu. Oguahẽ el tiempo cumplido. Opáichavo Hesu ndopytái upe ivy’a haguépente, he’íva Emiliano. Ojeity tapépe ha ndoguevíri. Hakúramo jepe la yvy, ojerovia Ñandejára oikuaaha ojapóva ha omohendáne haguã ipahápe opa mba’e. 

            Ha heta tapicha ndive ojuasa ohóvo. Ndaha’éiko Hesu año la ojejopýva. Umi 10 leproso osẽva haperãme avei oiko asy, hasy katu vai, mombyrymíguinte oñema’ẽ ha avave ndojái hese kuéra. Upéicha avei ñande sapy’a jahasa asy jave ikatu ñaimo’ã ñandénte gua’u la jaiko asy etereíva. Ha ndaupéichai. Heta oĩ ñande rapicha ohupíva júgo pohýi pohyive ñande hegui ha opáichavo ojeroviáva ha omboguata hekovemi. 

            Ko’a lepróso okuerase asýgui mombyry guive osapukái Hesúpe, oñandúgui ndaikatuiha okuera ijehegui. Ha Hesu oguata háicha avei omboguata ichupe kuéra hendive ohóva Jerusalénpe. Topuntea ha toho pa’i rendápe, toho tupaópe. Ha umi hasýva okuera ohóvo tapére, oguata aja ipotĩ hikuái. Oñondive jaguatávo Hesu rapére ñande avei jakuera jahávo ñane mba’asýgui. Ha umi 10 apytégui peteĩmínte ojere oagradese Hesúpe. 

            Eagradesépa Ñandejárape che reindy ha nde che irũ. Rehópa reñemoĩ henondépe, eñesũ, eñepomoĩ, eñembo’e ichupe nde py’aite guive, imba’e porã haguére nendive. 

Pa’i Jasy.