Ñahendu Hesu Ñe’ê. Domingo 15 de Diciembre

Escucha el evangelio y la reflexión en: https://youtu.be/gpwNRHfe4BY

Domingo 3° Adviento Ciclo A Mateo 11, 2 – 11

Juan Bautísta oĩva upérõ kárselpe, ohendu umi mba’e Cristo ojapóva. Upémarõ omondo idisípulokuéra apytégui Jesús rendápe. Ha’ekuéra oporandu chupe:
–Nde piko hína pe Juan he’i vaekue outaha, térãpa roha’arõ vaerã ambuépe?

Jesús he’i chupekuéra:
–Tapeho peje Juánpe ko’ã mba’e peẽ pehecháva ha pehendúva peína. Pemombe’u chupe ohecha’ỹva ohecha jeyha, paralítiko oguata porãha, lepróso okueraha, ohendu’ỹva ohendu jeyha, omanóva oikove jeyha ha imboriahúvape oñehendukaha marandu porã. Ha ovy’aiténe umi norrenegáiva che rehe che kuaa rire.
Juan remimbo’e kuéra ohokuévo, Jesús oñepyrũ oñe’ẽ hese opavavépe, ha he’i:
–Peẽ pesẽ ramo guare peho desiértope, mba’e pehecha haguãpa peho ra’e. Pehechápa ra’e takuára yvytu ombovaváva. Nahániri. Maerã aipo ramo peho. Pehópa pehecha peteĩ kuimba’e oñemonde jeguapávapa. Peẽ niko peikuaa porã umi oñemonde jeguáva oikoha mburuvicha guasu kuéra rógapente.

Amo ipahápe, mba’e aipo ramo pesẽ pehecha. Peteĩ profétape, ajépa. Upéicha añete. Ha pejuhu peteĩ mba’e guasuvéva profétagui katu. Juan rehe niko Ñandejára Ñe’ẽme he’i:
“Che amondo che ñe’ẽ rerahaha ne renonderã, ombosako’i haguã ndéve nde raperã.”
Añetehápe ha’e peẽme, ndaipóri yvypóra kuéra apytépe mba’e guasuvéva Juan Bautístagui. Opáichavo, pe michĩvéva Ñandejára Reino pe, upéva mba’e guasuve chugui.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Heta mba’e niko jahecha ha ñahendu Ñandejára rehegua ko Navida oguahẽ mbotápe, ha heta mba’e avei hyapu ha opararã ndaha’éiva Ñandejára rehegua, oñemomýiva ha ojejapóva Navida rérape, ndaha’éiva hina oñemomorã haguã Ñandejára Jesucristo jeju ñande apytépe. Umi mba’eta apytépe ñande avei sapy’ánte ikatu jaguapy ha ñapensa mba’épa añetehápe upe Navida ha mamópa jajuhúta Ñandejárape umi tyapu ha pararã ita pa’ũme.

Juan Bautista niko ohendu avei raka’e heta ñe’ẽ oguahẽva ichupe Hesu rehegua, ha okañy imi avei raka’e ha’e, ha oikuaa porãsegui ha’épa añete upe Ñandejára remimbou térãpa oje’énte hese upéva, omondo iñirũ nguérape oporandu haguã ichupete voi.

Ha mba’épa Hesu he’íne ñandéve avei ñaporandúramo ichupe mba’éichapa ikatu ñande jajuhu ha jaikuaa ichupe ko Navida rapére jahávo? Ani ágã japyta música, bomba ryapu, lu’i hendy ha oguéva, tembi’u ha ñemokõ apytépe. Ikatúnepa jaheka ichupe umi ñande rapicha oikotevẽva apytépe, ñamoirũvo hasývape, jahávo javisita préso, ñañandúvo ñane vesíno, térã ñane hénte kuéra oiko asy ha ojejopýva. Ñapensamína che irũ ha nde che reindy mba’épa ikatu jajapo ko Navida mboyve, ani ágã ojehasa ñande hegui ñande Navida peteĩ ka’u ko’ẽme ha okañy ñande hegui Hesu.

Pa’i Jasy.