Ñahendu Hesu Ñe’ê. Domingo 15 de septiembre

Ñahendu Hesu Ñe’ê. Domingo 15 de septiembre

                                               Lucas 15, 1 – 10.        

Upérõ, Jesús ombo’e jave hína, oñemboja hendápe umi impuésto okovráva Róma peg̃uarã, ha ijapytépe kuéra hénte reko vai atýra, oúva ohendu haguã chupe.  Umi Moisés léi ombo’éva ha fariséo kuéra katu osẽ oñe’ẽ Jesús rehe. He’i hikuái: — Kóva niko oiko hénte reko vai ndive, ha okaru avei hendive kuéra.

Upépe Jesús omombe’u chupe kuéra ko káso: Ja’éntena perekoha 100 ovecha, ha okañy mba’e pende hegui peteĩ. Mba’épa pejapóne. Ndapeheja mo’ãi nga’u piko umi 99, ha pesẽ peheka pe okañy vaekue.  Ág̃a pejuhúvo, pehupíne pende apére, ha vy’apópe pejevy pende rógape. Pehenóine pene irũme ha umi pende róga jere rupi oikóvape: “Pejúpy javy’a. Ajuhúma niko pe che ovecha okañy vaekue.”

Che ha’e peẽme, péicha avei ojehuha yvágape. Tuichave vy’a oiko upépe peteĩ heko vaíva oñembojáva Ñandejára rehe, umi 99 imarangatúvagui noikotevẽiva oñemboja. 

Ñandejára Hesukrísto ñe’ẽ. 

ÑAMBOGUEJY ÑANDE REKOVÉPE

            Téle ha rrádiope ñahendu jepi oñeporandu ndajahecháipa mitã terã mitãrusu osẽ vaekue hógagui ha ndojerevéi, okañy. Oñemombe’u héra ha ojechauka ha’anga. Isy, itúva, ha ihénte kuéra omomýi opavave, polisía jepe oiko oheka pe okañýva, ojuhu peve. Ñande voi niko sapy’ánte jaháramo peteĩ henda ndajaikuaáivape ikatu ñañedesatina ha ñakañy. Ha ñeporandúpe mante ñasẽ. Oĩ avei niko imba’e porãva, ñanemoirũ ha ñanerenohẽva voi tapépe.  

            Ñahendu ouha oñemboja Hesúre ha ohendu ichupe umi hénte reko vai ha umi impuésto okovráva Roma pe guarã hamba’e, pekador atýra. Ndaha’éi etéva hína oñembo’e ha oikóva tupaóre. Hesu katu omoguahẽ ha ombo’e Ñandejára ñe’ẽ ichupe kuéra, ha oho hógape hamba’e. Ha umi Moise léi ombo’éva, fariseo kuéra, tupaógui nosẽiva, oñepyrũma ohecha vai upéva ha oñe’ẽ guyguy Hesúre. Mba’éichapa aipo Ñandejára remimbou ojehe’áta hénte vai ndive. 

            Ha upépe Hesu omombe’u ichupe kuéra umi káso, ovecha okañy vaekue ha ojejuhu jeýva, pe mitãrusu osẽ vaekue itúva rógagui ha oñemoguahẽ jey vaekue vy’apópe, hamba’e. Pe tape vaíre oikóva, pekador ñahenóiva niko, ojavy pe tape, ha oike upérupi ndoikuaa porãigui ojapóva. Ikatu oime ndorekóigui ombo’e ha ohechaukáva ichupe iporãvéva ou okañy ha oñedesatina oikóvo. 

            Ha péva niko che irũ ha che reindy, pe Hesu oúva ñanembo’e. Pe religión añete niko ndaikatúi okondena ha ojeguaru umi hembiapo vaívagui. Ñasẽ vaerã niko jaheka ha ñamoirũ umi ojavýva hape, osẽ haguã hesakã háme. He’i háicha Papa Francisco: “Che aipotave peteĩ Iglesia oñemona ha oñemongy’áva, huguy syrýva jepe osẽ haguére kállepe, ha ndaipotái ete voi peteĩ Iglésia ñembotypy, hasy katúva okyhyje ha oiko porãségui”  (EG49). 

Pa’i Jasy.