Ñahendu Hesu Ñe’ê. Domingo 16 de febrero

Escucha el evangelio y la reflexión en: https://youtu.be/Qfj_NPI0HHo

Domingo VI TO. Ciclo A. Mateo 5, 20-22a. 27-28. 33-34a. 37.

Upéro Jesús he’i idisípulo kuérape: Che ha’e peẽme, peẽ peñeha’ãve ramo pejapo haguã Ñandejára rembipota umi fariséo téra Moisés mandamiénto ombo’évagui, peikéta Ñandejára Rréinope.

Peẽ niko peikuaa oje’e hague pende ypy kuérape yma: “Aníke reporojuka. Oporojukávape hekovia vaerã hembiapokue.” Che katu ha’e peẽme: “Opavavépe oñemyengoviáta hapicha ndive ipochy haguérente jepe. Ha oimérõ he’íva hapichápe ‘Nde tavy’, upéva ojereraha va’erã karai juez renondépe.

Peẽ niko peikuaa yma oje’e vaekue: “Ani reporomyakã ratĩ.” Che katu ha’e peẽme, oĩ ramo oma’ẽva kuñáre ha oguerekoséva chupe, upéva ipy’ápema voi omyakãratĩ hembirekópe.

Peikuaa oje’e hague pende ypy kuérape yma: “Ani Ñandejára rérare ere rejapotaha mba’e rejapo’ỹtava.” Che katu ha’e peẽme: “Ani mba’evére peje pejapotaha mba’e pejapo’ỹtava. Peme’ẽta ramo pene ñe’ẽ, pejénte ‘Néi’, térã ‘Nahániri’. Pejeve ramo, péva ou Añágui.”

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Oime niko he’íva pe religión ha tupao heta léi ha reglamento orekoha, ha ijetu’u sapy’ánte jajapopa haguã, oime voi he’íva: Pa’i ha obispo kuéra jepe niko ndojapopái hekópe, ha mba’e piko la ñande? Hesu he’i ñandéve upe léi ñaikotevẽha, ha’e ndoúi hague oipe’a haguã léi kuéra tupao reheguáva. Jajapo vaerãha umíva py’a porãme ha ani ñande retobado, térã jajapo pochýre ojejeruréva ñandéve tupaópe, ñande parroquia ha capilla-pe.

Opáichavo, ndaha’éi upe léi jajapo haguérente jaháta yvágape. Tekotevẽ añetehápe jahayhu Tupãme ñande py’aite guive ha ñande py’a porã ñande rapicha ndive jaike haguã yvágape, ñande rovasa haguã Tupã Ñandejára. Pe léi niko ikatu jajapo ijapéguionte, jajehechauka haguãnte jajapoha ñande rapicha renondépe. Tupã katu oma’ẽ ha oñandu ñande py’a ha ñane korasöme oĩva, ha mba’épa añetehápe ñañandu ha jaipota.

Upévare he’i Hesu pe jeiko porã ñande rapicha ndive ha’e pe léi tuichavéva, upe ñamotenonde vaerãva ñembo’épe jepe. Marãve naiporã mo’ãi ñandéve ñañembo’e puku ramo ha jaiko vai ñande rapicha ndive upe jave. Ha oiméramo jajoavy, tekotevẽ ñañeha’ã ñañemoĩ porã jevy ñande rapicha ndive, upéi jaju haguã ñañembo’e Tupãme. Upépe añete ha’e ñane rendu ha ñande rovasáne.

Pa’i Alberto Luna.