Ñahendu Hesu Ñe’ê. Domingo 18 de agosto.

Ñahendu Hesu Ñe’ê. Domingo 18 de agosto.

Domingo XX TO.                                                            Lucas 12, 49-53. 

Upérõ Hesu he’i idisípulo kuérape:   Tata amyendy haguã niko aju ko yvy ári. Ha nga’u ra’e hendýma katu hína.   Che katu niko añemongarai vaerã ágã upe tatápe, ha upéva oguahẽ aja che angapyhy.  Peẽ piko peimo’ã aju hague arúvo py’aguapy ko yvy ári. Ndaupéichai hína. Aju arúvo joavy.  Peteĩ ógape oikohápe cinco, mbohapy opu’ãne mokõire.   Túva ha ta’ýra opu’ãne ojuehe. Sy ha imemby opu’ãne ojuehe. Ména sy opu’ãne imemby rembirekóre, ha ha’e opu’ãne iména sýre.

Ñandejára Hesukrísto ñe’ẽ. 

ÑAMBOGUEJY ÑANDE REKOVÉPE… 

“Anive ñañorairõ, anive jaiko vai, torýpe ñamba’apo taimbarete ñande Paraguay”. He’i ningo peteĩ purahéi. Ha ajépa ningo hi’ãite ñandéve anivéma añete jaiko vai ha ñañorairõ. Hi’ãite añete jaiko tory ha joayhúpe. Jaikuaa jepe ningo avei ndaha’éi la jaiko porã meméva. Oĩ jajuavyha, nañasẽigui petei ñe’ẽme. Ha upéva oiko jepi ñande rógape, ñande vesíno kuéra ndive, ñande familia, ha ojepyso upérupi. 

Ñahendúramo Ñandejára ñe’ẽ ha jaháramo tupaópe katu ningo jaheka py’aguapy. Ha ñahendúramo Hesu he’iha ndoúi hague oguerúvo py’aguapy, ou ndaje ñanembojuavy haguã. Péa ñanembokuchu nunga. Mba’éiko péa, ja’e. Mba’e polítika pío péa. Ndapéicha rãicha ningo hína kuri. Ha’ete ku ñañedesatina léntova hína. 

Mba’eichagua piko oiméne hína pe tata oguerúva Hesu ko yvy apére ha oipotáva omyendypa opa mba’e oĩva guive. Oiméne ko Hesu he’ise ñandéve hína pe tata, Espíritu Santo rata ha’e oguerúva, omyendytaha ñande rekovépe umi mba’e porã Ñandejáragui oúva, ha upe jave avei ohapýta aña rembiapo kuéra. Ha upépe oĩ hína la pa’ã. Pe aña niko noñembojarúi hína ta’u nde ra’y. Ha’e noñembojarúi ete hína. Guérra ite la idelihéncia. Ndoheja rei mo’ãi hína Hesúpe ojavyky ha oipe’ase gua’u ichugui umi hese guáva. 

Hesu oúramo jepe py’aguapýpe, añeteguáva he’i, oipytyvõ oikotevẽvape ha imba’e porã opavave ndive, pe aña ndaupéichai. Ha’e mbaretépe oike, hova atã, ijapu, imonda ha ohasa hapicha akã ári, opyrũta voi hese, ndoikuaaséi mba’eve, ijupe guarãnte oipota. Ha upépe hendýma la ñande rekovemi jaikoséramo Hesu ndive, Ñandejára rapére. Ndajaháiramo jepe ñañorairõ ñande rapicha kuéra ndive, jaikuaa vaerã oĩtaha ndogustáiva, ñanderape jokoséva, ipochýva jepe ñanendive. Ñande rógape voi oĩta. Hesu ningo ñande avisánte, ndaha’éi ñande ñane bochinchero haguére la jaiko vaíta, térã katu Ñandejára oipotágui mba’e jaiko vai ñande rapicha ndive. 

Ha mba’etekópa che irũ ha che reindy la nde espíritu hína, eike haguã nde avei ko ñorairõme. Reñanimápa térãpa ipohýi etereíma ndéveramo guarã. 

Pa’i Jasy.