Ñahendu Hesu Ñe’ê. Domingo 25 de agosto

                               

Ñahendu Hesu Ñe’ê. Domingo 25 de agosto

Lucas 13, 22 – 30.       

  Upérõ Jesús oho jave hína Jerusalénpe, opyta puebloha rupi hamba’e, ha upe rupi ombo’e.   Peteĩ osẽ oporandu chupe: — Mbo’ehára, ndaheta mo’ãi umi ojesalvátava, aje.

Osẽ he’i Jesús:

  Peñeha’ã peike pe okẽ pychi’ĩ rupi. Cháke hetáta hína umi oikeséva Ñandejára Rréinope, ndaikatu mo’ãi ramo jepe oike.   Ágã Ñandejára ombotývo hokẽ, peẽ okápe pepytáva peñemoĩne pesapukái, “Karai, eipe’ána oréve ne rokẽ.” Ha’e osẽne he’i peẽme, “Che ndapoikuaái.”  Ha upépe pesẽne peje chupe, “Roguapy vaekue niko rokaru hamba’e ne ndive. Ha nde ore mbo’émi vaekue ore puéblo rupi.”   Ha’e katu he’íta peẽme, “Che ndapoikuaái. Pe che reja, peẽ tekove ahẽ.”

     Ha okápe pepytávo, peñemoĩne pejahe’o ha pende pochy pehechávo Abraham, Isaac, Jacob ha opa umi proféta kuéra oĩva hína Ñandejára Rréinope.   Opáguio oĩta oúva oguapy okaru haguã Ñandejára Rréinope.  

 Ha upépe, umi ko’ágã itapykuéva, tenondete oguapýta. Ha umi ko’ágã itenondéva, itapykuéta.

Ñandejára Hesukrísto ñe’ẽ. 

ÑAMBOGUEJY ÑANDE REKOVÉPE… 

            Ou vai vove ou vaipa. He’i ningo ñe’ē. Ha péicha ningo ñañeñandu ipohýi jave ñande rekove. Okañy vove ñande hegui vy’a ha ogue jave tetia’e. Ñamoĩ ichupe ñande rasykatúramo mba’e, térã katu ñane hénte mano jave. Jaikuaase voi ma’erãpa ñañeha’ã itereíta amo ipahápe ha ovalétapa ñandéve upe ñanerembiapokue. Nañamboapu’ái vaicha ñande rekovemíme mba’eve guasu. Ñañandu jahejapasénte ha ñasẽ ñakañy mba’e upégui.  

            Ñahendu angete Hesu oguata Herusalén rapére, oho hina upe ijetu’úta hápe hendive. Upépe jaikuaa ñande ha ha’e avei oñandupaitéma ohóvo hína hendýtaha hendive ha ojejopytaha ojejuka peve. Ha upéicha ramo jepe Hesu oho hese, ndoguevíri. Ha’e voi ijehegui oike upe okẽ po’i rupi. Upérupi oñandu ha’e Ñandejára oipota oipykúi hape. 

            San Ignacio niko he’i upe ijetu’u ha jajejopy jave ouha ñandéve ñamombykyse ñane rembiapo, térã katu  jahejase upe iporãva  jajapóva, ñamoñepyrũ vaekue Ñandejára rayhupápe. He’i San Ignacio, ñane kangy ha ñaime vai aja naiporãi ñasẽ ñande guatágui, ani jaguerova mba’eve, japytánte va’erã upe jajapóvape, jaha hese mbeguekatu mbói jo’ópe, jaiporu paciencia. Ñaime vai aja niko iñypytũ ha ityai upe ñande py’a ha ñane akã, ha upéicha jave pe aña espíritu hina upe ñanesambyhyvéva ha hendive ndaikatúi ñasẽ porã. Ñande py’aguapy vove katu niko Ñandejára Espíritu hína upe ñanesãmbyhýva, ha hendive katu ndaikatúi jajavy. 

            Anietéke jajapura ou vai vove che reindy ha nde che irũ. Jahánte hína hese, ñaha’arõ ñañeñandu porã jevy, tañande py’aguapy jevy. Ha upépe raẽ ikatúne jahecha porã mba’épa Ñandejára oipota ha oñanduka ñandéve, mba’épa oime tekotevẽva jaguerova ha jaheja, ha mba’épa iporãve jajapónte hina jahávo ha ani jaheja. 

Pa’i Jasy.