Ñahendu Hesu Ñe’ẽ. Domingo 26º Durante el Año

Escucha el evangelio y la reflexión en: https://youtu.be/f8X4TT7fJWU?si=XUECR7a2eu6B4RS6

Domingo 26º Durante el Año. Ciclo A Mateo 21, 28 – 32

Upérõ Jesús he’i umi pa’i guasu ha judío kuéra mburuvichápe: — Amombe’úta peẽme peteĩ karai ita’ýra mokõi vaekue káso. Pe karai he’i pe ijypykuépe, “Che ra’y, terehópy emba’apo ñandéve kokuépe.” Ta’ýra katu osẽ he’i chupe, “Ndahamo’ãi, ndahaséi”.

Upéi katu ombyasy péicha ombohovái hague itúvape, ha osẽ oho. Upe rire, pe karai oho ita’ýra pahague rendápe, ha he’i avei chupe oho hag̃ua omba’apo. Ta’ýra he’i itúvape, “Néi, che ru, aháta”, ha upéi ndohói. Peẽ pehechaháicha, mavaitévapa ojapo ra’e upe itúva ojerure va’ekue chupe.

He’i chupe hikuái: — Ha pe ta’ýra ypykue.

Upépe Jesús he’i chupekuéra: — Añete ha’e peẽme, umi impuésto okovráva ha umi kuña reko vai raẽ oikéta pendehegui Ñandejára Reinope. Juan Bautista niko ou va’ekue penembo’évo mba’éichapa peiko vaerã, ha peẽ napepenái vaekue hese.

Umi impuésto okovráva ha umi kuña reko vai katu oguerovia chupe. Ha peẽ pehecháramo jepe upéva,
napembyasýi pende reko vaikue ha ndapehejái, perovia hag̃ua chupe.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Heta ñande rapicha católico, ikarai, oñekonfirma, omenda tupao, térã oiko pa’i, hermána, térã katu oguata va’ekue comunidad pe, oiko catequista, animador, coordinador ha mba’e ome’ẽ iñe’ẽ kyre’ỹ pópe. He’i Ñandejárape, héẽ, ajapóta.

Upéi katu tapére ou ikane’õ. Upe iporãva’ekue ichupe iñepyrũmbýpe ou nahe’ẽvéi ichupe, ikuerái, ha ou opyrũ
pe ñe’ẽ ome’ẽva’ekuére. Upe néi he’iva’ekue oñepyrũvo ou osẽ nahániripe amo ipahápe.

Ha oime katu umi irariva’ekue Ñandejára rapégui. Iñepyrũme he’iva’ekue nahániri, tove, ndajaposéi, ndaikuaaséi. Ha upéi ou ohecha iporãha, ha oike omba’apo kyre’ỹ tupaópe, ijaty comunidad pe, ha oiko hapicha ndive ñembo’épe, retiro pe umícha.

Ñande niko ja’e porãséramo nañande py’a peteĩri. Ñane kangy, jaju ha jaha, oiko ñande hegui sapy’ánte umi ñanáicha, yvytu omoñenóva ágotyo ha upéi amógotyo.

Avave niko ndaikatúi he’i ijehe oime haguére tape porã rehe, ndaikatuicheneha ágã ko’ẽramo iñakã kuchu sapy’a ha osẽ oike javorái kuápe, oñehundi ha oñemona tujúre. Ha avave hembiapo vaívare ndaikatúi ja’e ndaikatuicheneha ágã ko’ẽramo opáy ojesape’a, ohechakuaa ojavyha ha ojevy tape porãre.

ÑAÑEMBO’E OÑONDIVE

Ñandejára Jesucristo, nde niko epyta vaekue ne ñe’ẽme ha nde py’a peteĩva’ekue Ñandejára rembijokuáicha, hembipota ejapóvo emohu’ã meve nde rekove. Ore pytyvõmíkena ore avei rojapo paite haguã hekopete upe romoñepyrũva’ekue Ñandejára rérape, ha ore py’a peteĩ haguã rojejokuái haguépe opa araite, romohu’ã meve ore compromiso. Amén.

Pa’i Jasy.