Ñahendu Hesu Ñe’ẽ. Domingo 26º Durante el Año

Escucha el evangelio y la reflexión en: https://youtu.be/OOTWmaiVG0c

Domingo 26 Durante el Año Ciclo C Lucas 16, 19 – 31

Upérõ Jesús he’i umi fariséokuérape: “Oikómi va’ekue ndaje raka’e peteĩ karai irríkova, oñemondéva ao hepy-hepyvévape. Ha ára ko’ẽre ojapómiva karu guasu neporã-porãva hógape. Hóga renondépe katu oñemoĩmiva peteĩ mboriahu chapĩ hérava Lázaro. Hete niko ikurupa ha umi jagua oúmiva oheréi umi ijaiha. Lázarope niko hi’ã ohupyty michĩmínte jepe umi tembi’u rembyre pe óga jára meságui oñemombóva.

Peteĩ ko’ẽme Lázaro omano. Ha Ñandejára ángel kuéra ou ogueraha chupe yvágape ha omboguapy chupe Abraham ykére. Upéi, omano ave pe rríko ha ojereraha oñeñotỹ, ha oho ojejuhu Aña retãme. Ha ohasa asy hágui hína upépe, ojesaupi sapy’a ha mombyry ohecha Abrahámpe, ha Lázarope ave oguapýva hína ijykére.

Ha oñemoĩ osapukái: “Che ru Abraham, che poriahuverekóna. Emondomína Lázarope tomyakỹ ikuã apymínte jepe ha tou tombopiro’y chéve che kũ. Vaípe niko ajecha hína ko tatápe.” Abraham katu he’i chupe: “Che ra’y, na ne mandu’ái piko amo yvýpe reikovépe, hembypa hague ndéve opaite mba’e. Lázaro katu, ivaikuete ohupyty va’ekue.

Ko’ágã, ha’e opytu’u ha ovy’a hína ko’ápe, ha nde katu ivaikuete reisu’u. Ha upéi ave, oĩ peteĩ yvykua pypuku ñane pa’ũme, ha avave ndaikatúi ohasa ko’águi upépe, térã upéguio ko’ápe.”

Upépe pe rríko osẽ he’i: “Abraham, emondóna upéicharõ Lázarope che rogayguakuéra rendápe. Ha te’i umi 5 che ryvýpe anivéma haguã ojapo ivaíva ani ágã ha’ekuéra ave ou ho’a ko’ápe ha oiko asy.”

Abraham katu he’i chupe: “Umi nde ryvy nga’u piko ndoguerekói Ñandejára Ñe’ẽ. Umíva niko ohecha vaerã hikuái ha ojapo upépe he’íva.” Pe rríko katu he’i: “Che ru Abraham, upéva niko na’iporãmbái. Peteĩ omano vaekue ohórõ hendápe kuéra, péicharõ oheja mba’éne hikuái heko vaikue.”

Abraham katu he’i chupe: “Nopenái ramo hikuái Moisés ha umi profétakuérare, piko openáta gua’u peteĩ omanóva oikove jevy ramo.”

Ñandejára Jesucristo ñe’ẽ

ÑAMBOGUEJY ÑANDE REKOVÉPE

“Aichejáranga ndaipóri”. Oje’e ningo pe máva ndohechakuaáiramo hapicha henondépe ohasa asýva hína. Ha péicha nunga niko hína ko káso Jesús omombe’úva. Pe rríko tata ogue’ỹvape okáiva niko ndaha’éi katuete irríko haguére upépe oho. Oikuaa porã ha nopenái haguére hapicha ijykerete oikotevẽvare katu oho Aña retãme ochyryry.

Ñama’ẽ aipóramo che irũ ha che reindy, mba’etekópa ñaime ñande rapichakuéra ñande jerére ojejopýva ndive. Ñañembotavýpa térãpa jaikuaa aichejáranga.

ÑAÑEMBO’E OÑONDIVE

Ñandejára Jesucristo, Nde rejúva emopu’ã ho’ávape ha eipohano hasývape. Ore pytyvõmi kena rombohasa haguã ore po oikotevẽvape. Nde rejapo haguéicha. Amén.