Lunes 1 de junio: María Iglésia sy

Escucha el evangelio y la reflexión en: https://youtu.be/0EgHVkpkQWU

Lunes Pentecostés rire: María Iglesia sy.

Juan 19, 25-27

Jesús kurusu ypýpe oĩ hína isy María, ha itia María ku Cleofás rembireko, ha María
Magdaléna ave. Jesús ohechávo isýpe ha ijykére oĩha hína pe idisípulo ha’e ohayhúva.
He’i isýpe: — Péina upépe ne memby.
Upéi he’i idisípulope: — Péina upépe nde sy.

Upe guive, pe Jesús disípulo ogueraha Maríape hendive hógape.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Oime niko ñande rapicha jajepokuaa itereiha, ha jahayhúva, ndaha’éi ramo jepe ñane hénte, ñane reindy térã ñande ryke’y, ndaha’éi ramo jepe ñande rógagua. Umívape ñahenói ñane ánga irû, térã angirû, ñañandúgui ñañomoirûha ñane remiandúpe, ha ñande py’aite guive ñane peteĩha, jajerovia ojuehe ha javy’a oñondive.

Ko árape ñamomba’e guasu hína Tupãsy María, ñande Iglesia sy ramo oheja va’ekue ñandéve Hesu. Ikatu porã ningo ja’e apóstol Juan ha’e hague Hesu angirũ, umi apóstolkuéra apytépe upe Hesu ohayhuve vaekue. Ha ñahendu San Juan voi omombe’u ñandéve mba’éichapa upe kurusu ykére oime hague ha’e omoirũ Hesúpe isy María ndive, ha mba’éichapa upe jave avei Hesu oheja ichupe Tupãsy María isyrã ha avei oheja pe iñangirũ ha’e ohayhuetéva isy Maríape imembyrã.

Ha upépe ikatu ñandejapa hína ñande avei jajeroviáva Hesúre ha jahayhúva ichupe, ikatu jaike avei Tupãsy María memby ramo, ha’e oma’ẽ haguã ñande rehe imembýre oma’ẽ haguéicha.

Hesu oheja isy María pe peteĩ familia tuichavéva, oñemosãva jeroviápe. Upéva ha’e hína upe Hesu Iglesia marangatu, ombyatýva opa umi Hesu voi ohenói va’ekue iñirũrã ha oiko vaekue hendive. Umíva opyta María pe imemby Hesu rekovia. Ha upévare ningo ñande ja’e María ha’eha ñande Iglesia sy, ñande sy.

Péva pe familia guasúpe, ha’éva ñande Iglesia, jaike hína jajeroviáva Hesúre, jaikóva hapykuéri, ñahendúva iñe’ẽ, jahayhúva Hesu ñane angirũ ete ramo. Ha upéva pe mborayhu Hesúre ningo ochovi pe isy María korasõme, hese ñañemboja ramo ñañembo’e ha jahayhu ramo ichupe, ndaikatúi ndajahayhúi Hesúpe.

San Ignacio niko ojerurémiva Tupãsyme omoĩ haguã ichupe imemby Hesu ykére, oikuaágui upe Tupãsy ohayhuvéva ha’e imemby Hesu, ha pe grásia tuichave ikatúva Tupãsy rupi jajerure Ñandejárape ha’e hína Hesu tojapo ñande hegui iñirũ, iñangirũ.

Rehayhúpa Tupãsy Maríape nde sy ramo, che reindy ha nde che irũ.

Mba’éichapa ehechauka ehayhuha ichupe. Ehayhúpa ave ñande Iglesia ijatyhápe umi
Hesu ndive oguatáva. Mba’éichapa ehechauka upe mborayhu.

Pa’i Alberto Luna.