Ñahendu Hesu Ñe’ê. Jueves 13 de febrero

Escucha el evangelio y la reflexión en: https://youtu.be/h6tqWUhj2GM

Jueves V TO Marcos 7, 24 – 30.

Jesús osẽ oho Tíro jerére. Oike peteĩ ógape ndoipotáigui avave oikuaa oguãhẽ hague
upépe. Pya’e oikuaa chugui hikuái. Ha peteĩ kuñakarai imemby mitakuña demóño
oguerekóva oho hendápe. Ko kuñakarai niko ndaha’éi judía. Ou vaekue Feníciagui,
opytáva Síriape. Oho oñesũ Jesús renondépe ha ojerure asy Jesúspe omosê haguã pe
demóño imemby kuñágui. Jesús katu he’i chupe: — Jaheja raẽna tokaru mitã mimi
ogagua. Na’iporãi niko jaipe’a ijurúgui tembi’u ha ñame’ẽ jaguápe.

Pe kuña he’i chupe: — Upéichako hína nde karai. Opáichavo, jaguánte avei niko
ho’úva umi tembi’u rembyre mitã oitýva mesaguýpe.

Jesús he’i chupe: — Añetéko pe eréva. Terehóntema ha anive repena. Pe demóño
oime osẽma ne memby kuñágui. Pe kuñakarai oguãhẽvo hógape, ojuhu imemby kuña hupápe. Pe demóño osẽma ra’e chugui.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Pe mitã ra’y niko hasẽ ojerure haguã isýpe omokambu haguã chupe, ha noñemokambúiramo katu hatavẽntema hasẽ, hasy katu vove hasẽnte avei omombe’u haguã oikotevẽha oñema’ẽ ha oñepena hese.

Ñande avei jajerure ramo ñande patrónpe ome’ẽ haguã ñandéve permiso, térã ohupi haguã ñandéve ñande sueldo mba’e, jaheka avei mba’éichapa jajeruréta, ha ñambojere ñane akãme mba’éichapa ja’éta pe jaipotáva japoko haguã ipy’áre, ñamohu’ũ haguã chupe, ha jaheka ho’a porã ñandéve ñañe’ẽ haguã chupe, oiporã jave.

Ñandejárape jajerure ramo ñembo’e rupive pe jaipotáva niko jaikuaa voi ndaha’eiha peteĩ jevýnte jajerure va’erãha, jaikuaa jajerure jey jey va’erãha, ñambojo’a va’erãha ñembo’e, Ñandejára, Tupãsy ha sánto kuérape ñamyangekói, ñamuña va’erãha pe jahekáva ha jaiko hatã pe jaipotáva rapykuéri.

Jahecha ko kuñakarai ndaha’éiva Israélgua ohóva Hesu rendápe ojerure chupe omonguera haguã imemby hasývape, Hesu katu oñemohatã chugui, oñe’ẽ pohýi chupe ha he’i ha’e ouha Israélkuéragua peguarãnte. Ko kuña oguevi rangue oho, hatãvéntema ojerure ha oñemoñe’ẽ ohupyty peve pe ohekáva. Hesu ohecha ramo ko sy oñeha’ã jey jeýva imembýre okonsegui peve oipotáva, ha ipahápe omonguera chupe.

Ehchápa hína che reindy ha che irû mba’éichapa ñande avei ñaha’ã mbarete va’erã umi mba’e porã jaipotáva, ndaha’éiva katuete ñandéve guarã, ha’éva ñande familia, ñande comunida, ñande rapicha kuérape guarã. Jajehova apíramo jepe jaha hese jaguevi’ỹre jahupyty peve umi mba’e porã ñaikotevẽva.

Pa’i Alberto Luna.