Ñahendu Hesu Ñe’ê. Jueves después de Ceniza

Escucha el evangelio y la reflexión en: https://youtu.be/RNMPhRKMqCY

Jueves después de Ceniza Lucas 9, 22- 25.

Jesús he’i idisípulokuérape: — Che niko heta ahasa asýta hína. Heta ojahéita che
rehe ñande ruvichakuéra, pa’ikuéra, ha umi Moisés léy ombo’éva. Che juka vaerã ágã
hikuái. Mbohapy ára haguépe katu aikove jeýta.

Upéi ojere he’i opa umi oĩvape upépe: — Oĩ ramo pende apytépe che moirũséva pehejapa perekóva, pehupi pende apére pende kurusu, ha peju che moirũ. Pende rekovére pene rakate’ỹrõ, peñehundíta. Pemanórõ che rehehápe katu, peikovéta. Mba’épe piko iporã peẽme perekopa opa mba’e, ha upekuévo pende po rupiete peñehundi.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Oñeme’ẽramo ñandéve jaiporavo haguã jehasa asy térã jehasa porã apytépe, katuete jaiporavóta jehasa porã, ha jajere mombyrýta jehasa asýgui. Oñeñe’ẽramo ñande
rehe, ñande jaipota oñeñe’ẽ porã, javy’a voi oiméramo imandu’a porãva ñande rehe.

Ikatúramo jajehekýi tembiapo pohýigui, pya’e jajei ha ñakañy chugui, jaiporavo jajapo
haguã ivevúiva, ñande piro’y ha ñanembovy’áva jaheka.

Ñande niko ñanemandu’a iterei ñande jehe, jajepy’apy ñande rekovére, ñanerakate’ỹ ñande retére, umi mba’e jarekóvare ñañemandu’a ára ko’ẽre, ha ñañemboja ramo Ñandejárare jaheka chupe ha’e ñanypytyvõ haguã, ha’e ojapo haguã pe ñande jaipotáva, jaipota Tupã ome’ẽmínte pe jajeruréva chupe. Jaipota Hesu ñanemoirũ ñande ñamoirũ rangue ichupe.

Ijáramo ñandéve jarekopávo ñande pópe opa mba’e yvy arigua jaipotáva guive, anichéne jaheja rei. Hesu katu he’i ñandéve ¿Mba’épa reguenohẽne che irũ reguerekopárõ opaite mba’e yvy árigua nde pópe, ha reñehundi ramo nde, rehundíramo nde rekove? Sapy’ánte ko ikatu jahayhúgui mba’e reta jaju ñande japu, ñanemonda, ñambotavy ñande rapichápe, jajapo mba’e vai jajapo’ỹ va’erã.

Hesu ohechakuaa iñirũ rehe ikangyha, ha’eño ha ijeheguínte ramo ndoho puku mo’ãiha. Upévare ha’e opuntea ha oipe’a ichupe kuéra ha ñandéve tape, hesarái ijehegui, ohupi ikurusu, ombovevúi haguã ñandéve ñande kurusu, upe ñande ndajaropu’akáiva ha ñanemokechẽva, upéva ha’e ohupi ñanendive, umi jeja’o, jehova api nañande py’áiva ñambohasa haguã, ha’e omboguapy ijehe ñanemombarete haguã. Orekose rangue opa mba’e yvy arigua ipoguype ha’e ome’ẽseve hekove ñanembovevúi ha ñande pe’a haguã ñandéve aña poguýgui.

Pa’i Alberto Luna.