Ñahendu Hesu Ñe’ê. Jueves 31 de octubre

Escucha la reflexión en :http:// https://youtu.be/EC-Nlpd0ar8

Lucas 13, 31 – 35

Upérõ og̃uahẽ Jesús rendápe fariséo kuéra, ha he’i chupe: — Pya’éke esẽ tereho ko’águi, cháke Herodes oime nde jukase hína.

Jesús he’i chupekuéra:

Tapeho peje pe aguarápe ko árape ha ko’ẽrõ amosẽtaha aikóvo demóño hamba’e, ha

amonguerataha hasýva. Ko’ẽ ambue ramo ae aikopáta. Aha jepe vaerã niko Jerusalénpe

ag̃uahẽ meve upépe ko’ẽ ambuérõ. Amo ipahápe niko, upépente voi proféta kuéra

ojejukáva.

Aichejáranga peẽ Jerusalénpe peikóva. Peẽnte voíko umi pejukáva profétakuérape ha

pembo’itáva umi Ñandejára omboúva peẽme. Hetaitéma niko pombyatyse vaekue ku

ryguasu ombyaty háicha imembykuéra ipepo guýpe. Peẽ katu ndapeipotái. Upévare, ko

pende róga opyta rei ha itaperéta. Ha nda che recha mo’ãvéi og̃uahẽvo ára pejévo,

“Tojehovasa pe Mesías oúva Ñandejára rérape”.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Umi mburuvicha vai ha omanda guasúva mbaretépe ningo oñembojára hapichakuéra rehe, ha oimo’ãma voi oĩha ipoguýpe ha ikatuha ojapo chugui kuéra ojaposéva.

Oraha ha ogueru mamo oipota hápe, ha oñeñanduka mbaretépe, mbyky voi hekovére mba’e opoko haguã ndojejapóiramo chupe he’i háicha ha oipota háicha.

Ha oĩ avei umi táva guasúpe oikóva ha oimo’ãva ha’e kuéra mba’e guasuveha umi tava’i térã kampáña hárupi oikóvagui. Upe táva capitalguáva, paraguaýguáva, sapy’ánte jahecha oñemoĩse voi umi ambue pueblo akã ári tuichavéramo guáicha.

Ko’ápe ñahendu umi fariséo kuéra ouha he’i Hesúpe mburuvicha Heróde ojukaseha chupe. Oimo’ã hikuái péicha omongyhyjéta ha omuñataha Hesúpe, osẽ haguã upégui ha okañy, upéicha ha’ekuéra ipiro’ýta ichugui hina.

Hesu katu ombohovái chupe kuéra, ha oñanduka ndokyhyjeiha mburuvicha vai pochýgui. Ojapopátaha upe hembiapo, Ñandejára ome’ẽ vaekue chupe ojapo haguã ha uperire ae osẽtaha oho. Hesu ohechauka ñaimeha Ñandejára poguýpe tenonderã ha ñaime va’erãha mamo ha’e ñande jokuái hápe, jakyhyje’ỹre mburuvicha vai kuéra opokóramo guarã ñande rehe mba’e.

Hesu avei oñandu mba’éichapa umi táva Jerusaléngua irari chugui ha nohenduséi voi ichupe, ha’e oúgui peteĩ pueblo’i kampáñagui. Oapo’i chupe hikuái ndaha’éigui upe táva capital gua. Ha péicha Hesu oñandu ipirépe heta ñande rapicha kampesíno térã indígena oñandúva oúramo oñehenduka Paraguaýpe. Mba’éichapa ikatúne che reindy ha nde che irũ jahechakuaa ha ñañandu avei umi ñande rapicha oñembotapykuéva ndive.

Pa’i Jasy.