Ñahendu Jesús Ñe’ẽ. Jueves II de Pascua

Escucha el evangelio y la reflexión en: https://youtu.be/THuYbBJlJfE

JUEVES II DE PASCUA San Juan 3, 31-36

Juan Bautista oñe’ẽvo Jesús re, he’i: Ñandejára Ra’y niko oĩ opaite mba’e ári. Umi yvy ariguáva niko yvy ariguánte voi, ha umi mba’e yvy arigua rehénte oñe’ẽ. Pe yvágagui oúva katu oĩ opaite mba’e ári, ha omombe’u umi mba’e ha’e ohecha ha ohendu va’ekue yvágape. Péicharõ jepe avave ndogueroviái chupe.

Ha oĩ ramo ogueroviáva chupe, pévaohechauka umi mba’e Ñandejára he’íva añeteha. Upe Ñandejára ombou vaekue niko omombe’u umi mba’e Ñandejára he’i vaekue chupe, Tupã omyenyhẽgui chupe ijespíritu reheve. Túva niko ohayhu ta’ýrape, ha omoĩ chupe opaite mba’e ári. Pe ojeroviáva ta’ýrare oikove va’erã opa ára. Pe ojerovia’ỹva hese katu ndoikove mo’ãi. Ñandejára tukumbo oúta hi’ári.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Heta mba’e ñande yvypóra, kuña ha kuimba’e ikatu jajapo, ñande katupyry, ñamba’apo, ñañemoarandu, ñañeorganisa, ñamboguata ñande róga, ñande familia, ñane comunida, ñande barrio, ñane retã, ha ko’ãga ave ñamosãma ko múndo tuicha háicha, ndaiporivéima ñandéve mombyrýva ñaguahẽ’ỹha.

Opáichavo heta mba’e noĩri ñande pópe, ndaikatúi ñamohenda jaipota háicha. Oime ipu’akavéva ñande hegui, oĩva yvypóra ári, ha upéva ñande apo hare, ko yvy ha yvága jára, ha’éva avei Ñandejára, oĩva opa mba’e ári.

Ichupe, he’i Juan Bautísta, tekotevẽ ñamomba’e guasu, ñañakãity henondépe, jaguerohory; ha jaikuaa pype ha’eha Ñande Ru ñande rayhúva, jahayhu ha jahecha ramo ñande avei ichupe ta’ýra ha tajýra teéicha. Ha Tupã Ñandejára ombou ñandéve yvágagui ita’yra Hesúpe, he’i Juan Bautísta, omombe’u haguã ñandéve mávapa ñande ru, oikuaauka haguã avei ñandéve upe iTúva omombe’u va’ekue ichupe.

Jesús ndive jaikuaa mávapa upe omboúva ichupe, mávapa pe yvategua, yvy ha yvága jára; ha hendive jaikuaa avei mávapa ñande yvypóra añetehápe, ha
maerãpa oñeme’ẽ ñandéve ñande rekove ko yvy apére.

Mba’épa reñandu che irũ ha nde che reindy. Oimépa pe Hesu ñe’ẽ ehendúvo nepytyvõ ha omyesakã ndéve nde rekove. Oime piko ovale ndéve reikokuaave haguã.

Eñandúpa umi Hesu nembo’éva rupi eikuaa porãveha ehóvo Ñandejára ñande rúpe. Mba’eichaitépa ikatúne eñemosã mbareteve hese.

Pa’i Alberto Luna.