Ñahendu Jesús. Viernes 2º Pascua

Escucha el evangelio y la reflexión en: https://youtu.be/_GdlSSm1Vv0?si=2UU1tfF95esn89rG

Viernes 2º Pascua San Juan 6, 1-15

Upérõ Jesús ohasa Lágo Galiléa mboypýri, hérava avei Tiberias. Ha heta oĩ ohóva hapykuéri, ohechágui ha’e kuéra umi milágro ojapóva Jesús omonguerávo hasývape. Jesús ojupi peteĩ sérro ru’ãme ha oguapy upépe idisípulokuéra ndive.

Hi’aguĩma upérõ Páskua, judíokuéra arete. Jesús ohechávo hetaha umi hapykuéri ou vaekue, osẽ he’i Felípepe:— Moõ piko jajuhúta tembi’u ñamongarupa haguã ko’ãvape.

Jesús he’i reínte péicha Felípepe, ohecha haguã mba’épa ha’e he’i. Jesús niko oikuaáma voi mba’épa ojapóta.

Felipe he’i chupe: — Opavavépe jahupytykátarõ michĩmínte jepe niko ñaikotevẽ amo 1 áñope ñaganáva.

Upépe Andrés, Simón Pedro ryvy ha Jesús disípulo avei, he’i Jesúspe: — Oime niko árupi peteĩ mita’i oguerekóva 5 pan seváda ha mokõi pira. Umíva jepe niko ndaha’éi mba’eve ko’ã genteta peguarã.

Kapi’ipe porã niko upépe, ha Jesús he’i idisípulo kuéra omboguapypa haguã opavavépe.

Oĩ upépe amo 5.000 kuimba’e rupi. Upéi Jesús ojagarra umi pan, ha ome’ẽ rire grásia Ñandejárape, oipehe’ã ha ome’ẽ opa umi oguapývape. Péicha avei ojapo umi pira reheve.

Ha ome’ẽ chupe kuéra ho’useha peve. Hyvãtãmba rire, Jesús he’i idisípulokuérape:— Pembyaty pe hembýva, ani haguã oñehundi rei.
Ha ombyaty ha omyenyhẽ hikuái 12 ajaka renyhẽ umi 5 pan rembyrégui. Ha ohechávo hikuái ko milágro Jesús ojapóva he’i:— Kóva niko hína ku proféta ou va’erãva ko yvy ári.

Jesús ohecha kuaávo mbaretépe oguerahaseha chupe hikuái omoĩ haguã chupe irréykuéra ramo, ojupi chugui kuéra pe sérro ru’ãme ha’eño oĩ haguãme.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Mba’épa jajapóta ñamongaru haguã iñembyahýiva ha isoguéva. Mba’épa jajapóta ñaipohano haguã hasýva ha ndorekóiva ipohã repyrãme. Mba’épa jajapóta ñamonde haguã iperõva ha ndorekóiva ojogua haguã ijaorãme. Mba’épa jajapóta ñambo’e haguã itavýva handohóiva escuélape. Mba’éicha ñamohendáta ndahógaiva, ndaijyvýivape.

Jesús he’i ani ñaha’arõ jareko heta ñame’ẽ haguã oikotevẽvape. Jaiporu pe jarekóva, oĩmíva ñamboja’o ha ñambohasa ñande rapichápe. Tuicha mba’e hina nde che irũ ha che reindy, pe michimi ñame’ẽva ñande py’aite guive, ñambojoapývo ñaneremime’ẽ Ñandejára rérape.

Ha’e péicha omba’apo. Ojevalese ñande rehe. Oipota ñamoĩ pe jarekóva, michĩramo jepe. Upéva ha’e hina pe semilla ikatúva osẽ ichugui peteĩ yvyra máta guasu hi’a hetáva.

Pa’i Alberto Luna.