Ñahendu Jesús Ñe’e. Sábado 2º Pascua

Escucha el evangelio y la reflexión en: https://youtu.be/M3cyCyHdTt8

Sábado 2º Pascua San Juan 6, 16 – 21

Upe jave, pyhare oguãhẽmbotávo, Jesús disípulokuéra oguejy pe lágo rembe’ýpe, ha ojupi peteĩ kanóape ohasa haguã lágo Galiléa mboypýri. Ohasase hikuái Cafarnaum puéblope. Upéi katu pytũma ha Jesús noguãhẽi gueteri hendápekuéra. Ha ho’a sapy’a peteĩ yvytu ne ratãva, ha upe y oñepyrũ ipochy.

Ohóvoma hikuái amo 5 km kuéra rupi, ohecha sapy’a hikuái Jesúspe oguatáva oúvo pe y apére. Ha oñembojávo oúvo hendápe kuéra, oñepyrũ okyhyje hikuái. Jesús katu he’i chupe kuéra: — Chénteko hína. Ani pekyhyje.

Ovy’a hikuái Jesús ojupívo hendive kuéra. Ha upévo, oguãhẽmbaitéma katu hikuái pe y rembe’y ohohápe.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Oime niko sapy’ánte ijetu’úva ñande rekovépe, tekotevẽva ñahenonde’a, jajapo va’erã ndajajaposéiva, ñañe’ẽ va’erã ñande rapicha ndive ñamyesakã haguã hendapy’ỹva, ñamohenda haguã ivaíva. Ha umíva ndajajaposéi, ñañembotavy, ñambohasa, térã katu jajere ichugui. Ijetu’u voi ningo umíva, maerãpa ñañombotavýta.

Jahecha Jesús irũ nguéra oike márpe, ha pytũma, ha Hesu ndoúi hendivekuéra. Ha upépe opu’ã peteĩ yvytu ratã omondýiva chupe kuéra. Ha pe ipochyve jave pe yvytu ha pe y avei, upe jave ou Jesús hendápekuéra ha okyhyje hikuái oimo’ãgui póra.

Upéicha avei ñande ñambohováivo ivaíva, opu’ã ñande rehe yvytu ratãicha ha ñande rypýi upe y pochýicha, ñanemondýi ha ñanemongyhyje. Ha’ete voi pe Aña ñanemokõtava ha ñanembopytupátava amo huguápe ñane rundi haguã. Upéicha jave ñañemondýi ha jakyhyjégui Ñandejára jepe oñemboja ramo ñande rehe ñanemboduda.

Jesús katu ndohejái iñirũnguéra oñapymi. Ou ha’e ñane rendápe ndajahecha porãi ramo jepe ha’eha upe oúva ñande sokorre. Ou ombohasa yvytu pochy, ome’ẽ py’aguapy. “Ani pekyhyje – he’i – che aime pende ykére hina”, he’i.

Jaike jave ijetu’uve hápe aipóramo, che reindy ha nde che irũ, ñanemandu’ami ko torménta vai oityvyro ha omoñapymi mo’ãite va’ekue Jesús apóstolkuérape. Ha ani jaguevi, ani ñane py’a mirĩ. Pe ivaive vove aiguĩve oĩ ñande hegui Jesús hína, ñane kangyve vove ñande rupi ha’e ha yjyva ári ñanemoguahẽ.

Pa’i Alberto Luna.