Ñahendu Hesu. Cristo Rey ára

Escucha el evangelio y la reflexión en: https://youtu.be/7khMJf9YArc

Domingo 34 Durante el Año Ciclo A. Cristo Rey ára. Mateo 25, 31 – 46.

Upérõ Jesús he’i: Ágã che ajuha ára mburuvicha guasúicha, aju va’erã Ñandejára ángelkuéra ndive. Ha ajúne aguapy karai guasúicha. Ha hénte kuéra opa hendágui oúne oñembyaty che renondépe. Ha upépe che aipe’áta ojuehegui umi heko porãva heko vaívagui, ku ovecha rerekua oipe’aháicha ojuehegui ijovecha ha ikavara.

Umi heko porãva amoĩne che akatúa gotyo ha umi heko vaíva katu che asu gotyo. Upépe che ha’éta umi heko
porãvape, “Peju, peẽme niko che ru pende rovasa. Peju ha peñemomba’e Ñandejára Reinore, ha’e voi niko ojapo va’ekue peẽme guarã iñepyrũmbýpe. Che ñembyahýi ramo guare niko, peẽ che mongaru vaekue. Che yuhéi ramo, peẽ che mboy’u. Ha aiko ramo mombyrygua ramo, peẽ che moguãhẽ va’ekue pende rógape. Che opívo ramo, peẽ che monde va’ekue. Che rasy ramo, peẽ che andu. Préso ajereraha ramo, peho va’ekue che rendápe.”

Upévo, umi heko porãva he’íne chéve, “Ñandejára, araka’e piko rohecha neñembyahýi ramo ha romongaru. Araka’e piko rohecha nde yuhéi ha romboy’u. Araka’e piko romoguãhẽ mbohupa ramo ore rógape. Araka’e piko nde opívo ha romonde. Araka’e piko ndéve rohecha nde rasy ramo, térã rejeapresa ramo ha roho ne andúvo.” Ha che ha’éne, “Añete
ha’e peẽme, opa mba’e pejapo vaekue che ryvy kuéra michĩvévare, che rehe pejapo ramo guáicha va’ekue.”

Upéi katu ha’éne umi heko vaívape, “Pejei chehegui. Ñandejára ojahéima pende rehe. Tapeho pe tata ogue’ỹvape oñembosako’i va’ekue Aña ha iñirũnguérape. Che ñembyahýi ramo, na che mongarúi va’ekue peẽ.

Che yuhéi ramo, na che mboy’úi. Che retãgui asẽ ramo, na che moguãhẽi vaekue pende rógape. Che opívo ramo, na che mondéi vaekue. Che rasy ramo ha ajeapresa ramo, na che andúi vaekue peẽ.” Upépe ha’e kuéra he’íne chéve, “Ñandejára, araka’eve niko ndorohecháiva neñembyahýi ramo, térã nde yuhéi ramo.

Araka’eve ndoroikuaái resẽ hague ne retãgui térã nde opívo hague, térã nde rasy, térã reho hague préso.” Ha che ha’éne chupekuéra, “Añete ha’e peẽme, opa umi mba’e ndapejapói va’ekue peteĩva umi michĩvévare, che rehe ndapejapói ramo guaréicha.” Opa umi heko añáva oñehundíta aña retãme. Umi heko potĩva katu oguerekóta tekove opa’ỹva.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Estudiante kuéra oime oike joa hína exámenpe. Ha Jesús he’i ñandéve, mba’épa oñeporandúta hína pe examen ára pahápe. Ndaha’éi jaikuaápa bíblia, jahápa ra’e tupaópe, ñañembo’épa. Noporandu mo’ãi ñandépa católico, evangélico, judío, térã ambue religióngua. Peteĩ mba’énte oikuaaséta, he’i. Jaiporiahuverekópa ra’e ñande rapicha oikotevẽva, térãpa ñañembotavy ichugui. “Aichejára anga” oiméne ere, che reindy ha nde che irũ, rembyasy ramo nde rapicha. Ha ere porã: “Ái-che-Jára”. Ñandejáraite voi hína pe tapicha oikotevẽva.

ÑAÑEMBO’E OÑONDIVE

Ñandejára Jesucristo, emohu’ũ ore korasõ rohechakuaa ha roipytyvõ haguã ndéve, rejúva esẽ ore rapépe mboriahu, ha’eño, préso, iñembyahýi ha oikotevẽva rupive. Amén.

Pa’i Jasy.