Ñahendu Hesu. Sábado 33º Durante el Año

Escucha el evangelio y la reflexión en: https://youtu.be/gQ098uZIns0

Sábado 33º Durante el Año

Lucas 20, 27 – 40

Peteĩ árape, saduséokuéra oho Jesús rendápe. Ha’ekuéra niko ndogueroviái omanóva oikove jeyha.

Upévare he’i Jesúspe: — Mbo’ehára, Moisés niko oheja va’ekue oréve kuatiápe, peteĩ kuimba’e omanórõ hembireko imemby’ỹre chugui, tyvýra omenda va’erãha hembirekorére. Ha upe kuña imemby ramo, pe mitã opyta tyke’ýra ra’ýrõ.

Oiko vaekue ndaje raka’e 7 kuimba’e ojoryvýva. Pe ijypykue omenda, ha omano ta’yra’ỹre. Upéi katu pe mokõiha, ha pe mbohapyha omenda hembirekorére, omano ha nda’ita’ýrainte avei hikuái. Ha upéicha, oho omenda paite pe kuñáre umi hembyre, ha nda’ita’ýrai avavete. Ipahápe omano avei pe kuña. Ha néi, ág̃a ojeikove jey vove, piko máva rembirekóta hína pe kuña. Omenda paite niko hese umi 7.

Jesús he’i chupekuéra: — Ko yvy ári jaikove aja niko, kuña ha kuimba’e omendáva voínte. Ha Ñandejára mante niko oikuaa máva-mávapa oikove jeýta. Ha ág̃a upéva ojehu vove niko ndaipóri mo’ã véima ñemenda. Ndaipóri mo’ã véima omanóva ave.

Maymáva oikóta Ñandejára ángelkuéraicha, ha Ñandejára mba’éta ha’e kuéra oikove jey haguére. Moisés voi niko ohechauka ñandéve omanóva oikove jeytaha. Ku jukeri hendypárõ guare okai’ỹre ykére oĩ ramo guare, niko ha’e he’i va’ekue Ñandejára ha’eha Abraham, Jacob ha Isaac Tupã. Ñandejára niko ndaha’éi omanóva Tupã. Ñandejára niko oikovévape Tupã. Ñandejára peg̃uarã niko opavave oikove hína.

Umi Moisés léi ombo’éva oĩva upépe he’i chupe upérõ: — Mbo’ehára, ere porãiterei chupekuéra. Upe rire katu, avavéma noporandusevéi chupe mba’eve.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Nda aréi ete niko jahasa kuri “lasánima ára”, ñanemandu’aha ñane héntekuéra omanóma vaekue rehe. “Ñande reja huláno”, oime he’íva umi omanóva rehe.Oĩ katu he’i pohyivéva: “Oikopáma hese”. Oĩ voi niko ndoroviáiva oĩha ñande rekove ñamano riregua. Ha oikóva ko yvy ári ndaipóriramo guáicha uperiregua, noiméiramo guáicha Ñandejára oporandu va’erãva chupekuéra mba’épa ojapo iporãva térã ivaíva.

Hesu he’i ñande rekove ndopaiha ñamanóvo. Jarekota peteĩ tekove pyahu iporãva, ndaha’éiva ko ñande rekove ko’ãga jarekóvaicha. Ñande py’aguapýta.Ndajaiko mo’ãveima jepy’apýpe, angekói ha mba’e pota pópe. Ñaiméta vy’a ha py’a peteĩme. Ñandejára ñanemohenda porãta hendive ha ñane pehenguekuéra apytépe.

Reñandúpa che irũ ha che reindy umi ne hénte kuéra ohóma va’ekue oikoveha Ñandejára ykére ha upe guive nemoirũha nde guatápe.

Pa’i Jasy.