Ñahendu Hesu. Miércoles 34º Durante el Año

Escucha el evangelio y la reflexión en: https://youtu.be/iIsxgLqRqyU

Miércoles 34º Durante el Año

Lucas 21, 10 – 19

Upérõ Jesús oñe’ẽ idisípulokuérape upe ára ha’e ou jeytaha rehe, ha he’i: Peteĩ tetã opu’ãne ambuére, ha opa rupi oñepu’ãmbáne ojuehe. Heta va’erã ág̃a yvyryrýi, ha oúne ñembyahýi ha mba’asy opa rupi. Yvágare pehecháne mba’e pehecha’ỹva, ha umíva tuicha penemondýine.

Opa ko’ã mba’e ojehu mboyve, oĩ va’erã ág̃a pene muñáva ha pende reraháva préso. Pejereraháta umi tupao ruvicha renondépe. Pe’áne ave mburuvicha guasu kuéra pópe, che disípulo haguére peẽ.

Upéva ojehúvo, ijáne ág̃a peẽme peñe’ẽ hag̃ua che rehe chupekuéra. Anínte pejepy’apy peje vaerãre. Che pomo’arandúne upévo, peikuaa hag̃ua mba’épa pejéta. Ha umi pende rehe ija’e’ỹva ndaikatu mo’ãi he’i peẽme mba’eve.

Pende rogagua voi pene ra’ã va’erã ág̃a pende kupe guio. Pende ru, pende ryvy téra pende ryke’ykuéra voi pene me’ẽ va’erã ág̃a mburuvichakuérape. Oĩ va’erã ág̃a pende apytépe ojejukáva. Ha che disípulo haguére peẽ, avave nda’ija’e mo’ãi pende rehe.

Anínte pejepy’apy. Peteĩ pene akãrague jepe ndo’ái chéne pende hegui. Pejerovia mbarete ramo che rehe, pejesalváta.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Ko Hesu ñe’ẽ ñanemomandu’a 6 pa’i hesuíta ojejuka vaekue San Salvadorpe, amo Centroamérica mbyte rupi. Hendive kuéra ojejuka va’ekue avei peteĩ kuñakarai omba’apóva pa’i kuéra rógape ha imemby kuña.

Pa’i Ignacio Ellakuría, Pa’i Ignacio Martín Baró, Pa’i Amando López, Pa’i Segundo Montes, Pa’i Joaquín López, Pa’i Juan Ramón Moreno, Kuñakarai Elba Ramos, ha imemby kuña Celina Maricet Ramos, ojejuka vaekue upe 16 de noviembre 1989 ko’ẽmboyve. Oike rire hógape militarkuéra omopu’ã chupe kuéra hupágui ha oraha korapýpe ha upépe ojapi ojukapa peve ha oheja kapi’ipe ári ojepyso he’õngue.

Upéro El Salvadórpe oĩ va’ekue peteĩ rrevolusion. Hetaiterei oĩ va’ekue ojejukávañorairõme, guerrillero ha militar, ha ipa’ũme ojejuka avei heta campesino opytáva mbytépe. Oĩ ojesekuestráva, ojetorturáva, mitã, tuja, opaichagua.

Umi jesuitakuéra ombo’e va’ekue universidápe oñeha’ã py’aguapýre, opa haguã ñorairõ ha toñemoĩ peteĩ ñe’ẽme gobiernogua guerrilla ruvichakuéra ndive, anive haguã oĩ ojejukáva.

Oĩ ndohecha porãiva upe tembiapo, mbaretépente ohoséva, ha he’íva umi jesuita ha’eha comunista, ha’ekuéra voi omokyre’ỹha umi guerrillérope. Ipahápe umi militar ojuka ichupekuéra upévare. Ha upéicha ou oiko hesekuéra upe Hesu he’íva: “Oiméta pende apytépe ojejukáva che disípulo haguére”. Ha péva che irũ ha che reindy, ndaha’éi ymavénte oiko va’ekue, oiko gueteri ko’ágã peve.

Pa’i Jasy.