Ñahendu Jesús Ñe’ẽ. Lunes 34º Durante el Año

Escucha el evangelio y la reflexión en: https://youtu.be/Yh7KjqVEcKg

Lunes 34º Durante el Año

Lucas 21, 1 – 4.

Jesús oĩ jave tupaópe, ohecha mba’éichapa umi irríkova omoĩ umi iñofrénda pe pláta ryrúpe. Ohecha avei peteĩ kuña viúda mboriahu omoĩrõ mokõi níkel ra’ymi.

Upépe Jesús osẽ he’i idisípulokuérape: — Ha’éta peẽme peteĩ mba’e. Amóva amo viúda mboriahu ome’ẽ hetaiteve opavavégui. Maymáva niko ome’ẽ hembýva chupekuéra guinte. Ha’e katu imboriahu pa’ũme, ome’ẽmba oguerekomíva, hembi’u repy rangue jepeve.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Oguahẽva niko ñane rendápe ojeruréva kontrivusion, ñame’ẽmi haguã hasývape, oikotevẽva peguarã. Oiko sapy’ánte rrífa, ojejerure avei ao ro’y jave, térã tembi’u oñeme’ẽ haguã ndorekóivape.

Oĩ osẽva kállere ombyaty koléktape níkel ha pláta sa’i ñepytyvõrã. Oikóma katu campaña guasu osẽva télepe, rrádio ha diáriope oñembyaty haguã pláta. Tuicha oñemomarandu umi ome’ẽva opyta porã haguã hénte renondépe.

Tupaópe oñembyaty avei pláta mísa hápe. Ha jahárõ jajerure ñembo’e ñane hénte omanóvare térã bautismo, menda ha mba’e, ojejerure avei ñame’ẽ haguã ñaipytyvõ haguã ñande iglésiape. Ha oĩ nome’ẽséiva térã katu ojeplagueáva opo’ẽvo ivolsíllope ome’ẽ haguã tupaópe guarã.

Ñame’ẽ va’erã ningo ñande Iglésiape, oñangarekóva ñande rehe ñande karai guive ha ñanerekombo’éva jakakuaávo ñande rekove pukukue jave. Ha oñembo’e va’erãva ñande rehe ágã ñamano rire jepe.

Tekotevẽ ñamoĩ ñande resa renondépe opa mba’e jarekóva ha’eha Ñandejáraremime’ẽ. Oñeme’ẽ haguéicha ñandéve ñande po jera ha ñame’ẽ va’erã avei. Ha ndaha’éi tembyre añónte. Ñame’ẽ va’erã mba’e porã ha jahayhúva añete. Ani ñanerakate’ỹ ha ñambyasy pe ñame’ẽva. He’i ningo San Pablo Corinto guápe: “Ñandejára ohayhu upe vy’apópe ha ipy’aite guive ome’ẽvape” (2Cor.9,7).

He’i avei San Alberto Hurtado, pa’i jesuita chiléno: “Ñame’ẽ vaerã ñañandu peve hasy upe ñame’ẽva”. Upéva he’ise hína jaipe’a vaerãha ñande jehegui ñande forsaimi peve. Sonsérante ñame’ẽramo niko nañañandumo’ãi. Nde pojerápa che irũ ha che reindy. Noiméipa emboja’o mieve va’erã upe Ñandejára ome’ẽvagui ndéve mba’e.

Pa’i Jasy.