Ñahendu Hesu Ñe’ê. Jueves VII de Pascua

Escucha el evangelio y la reflexión en: https://youtu.be/7qAfSWbASIo

Jueves VII Pascua

Juan 17, 1b. 20-26

Upérõ Jesús omaña yvága gotyo ha oñembo’e Tupãme he’ivo: “Che Ru, ndajejuréi niko ndéve hesekuéra añónte. Añembo’e avei ndéve umi che rehe ojeroviátavare ohendúvo chupekuéra. Ajerure ndéve ojoajupa haguã hikuái. Ha nde, che Ru, ne peteĩháicha che ndive ha che ne ndive, péicha avei ha’e kuéra peteĩnte haguã ñane ndive.

Péicharõ, opa yvypóra ogueroviáta nde hague upe che mbou va’ekue. Che amomba’e guasu chupekuéra nde che momba’e guasu haguéicha, peteĩnte haguã ha’ekuéra oñondive, nde ha che ñane peteĩháicha. Che aiméta ipype kuéra ha nde che pype ojoaju porã haguã hikuái, ha peteĩnte haguã ha’ekuéra oñondive. Péicharõ, opavave ohecha kuaáta nde che mbou hague, ha nde rehayhuha chupe kuéra chéve che rayhuháicha.

Che Ru, ko’ãva niko nde reme’ẽ vaekue chéve, ha aipota ha’e kuéra oĩ che ndive upe aimetahápe. Upépe ohecháta hikuái pe tekove mimbipa reme’ẽ va’ekue chéve che rayhúgui opa mba’e rejapo mboyve. Che ru marangatu, umi héntekuéra yvy arigua niko na nde kuaái. Che katu roikuaa, ha ko’ãva oikuaáma avei nde che mbou hague.

Aikuaauka chupekuéra mávapa nde, ha ajapovéta gueteri ahávo. Péicharõ, oĩta ipype
kuéra pe mborayhu che rehe rerekóva, ha che avei aiméta ipype kuéra.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ñane retãme ñaiméva haimete opavave ñande karai Ñandejára Hesukrísto rérape. Haimete opavave ñande ha’e cristiano, jajeroviáva Hesúre. Jepevéramo ndaha’éi opavave peteĩ iglesiagua. Ñaime católico, protestante, evangélico, ha oparupiete jahecha iñasãi heta iglesia guáva tupao ha capilla, ombyatýva umi ojeroviáva Hesúre oñembo’e ha ohendu haguã Ñandejára ñe’ẽ.

Ñahendu kuri Hesu ojerure Ñandejárape umi ojeroviáva hese ipeteĩ haguã, ha’e ipeteĩ háicha itúva ndive. Upéicha mante, he’i Hesu, ñande rapichakuéra ko múndo pýre oikóva oroviáne Hesu ha’eha Ñandejára remimbou.

Ha ñande katu mombyry gueteri ñaime ñanepeteĩ haguã umi cristianokuéra ndaha’éiva católico ndive; evangélico, protestante, ortodoxo, kuéra ndive. Mbyky voi sapy’ánte jaiko vai haguã mba’e jeja’o ha tova pukúpe, ñañeha’ã rangue jaiko porã oñondive. Ha ñahendúma niko mba’éichapa Hesu oipota kuri ha ojerure asy itúvape ñane peteĩ haguã hese jajeroviáva. Tañanepeteĩ ha tañañomoirũ, ñande ha’éva Cristo irũ.

Mba’épa nde che irũ ha che reindy eñandu ñanepytyvõta ñasẽ haguãicha ojupe ha jaiko py’a porãme católico ha evangélico, ortodoxo ha protestante. Mba’éichaitépa ñambohapéta ñemongeta, jotopa, ñamboguatáta tembiapo ha ñembo’e oñondive, opavave Hesúre jajeroviáva. Mba’épa ehecha nde.

Pa’i Alberto Luna.