Ñahendu Hesu Ñe’ê. Lunes 27 de enero

Escucha el evangelio y la reflexión en:

Lunes III Tiempo Ordinario                                                               Marcos 3, 22 – 30.

Uperõ Moisés léi mbo’ehakuéra oguahẽva’ekue Jerusaléngui he’i avei Jesús rehe: “Satana, añanguéra ruvicha voi nikohína pe ohejáva chupe omosẽ umi  añanguérape”. 

Jesús ohenói ha he’i chupekuéra ñe’ẽ mbojojápe: “Mba’éicha piko ikatúta Satana omosẽ Satanáme? Peteĩ tetã oñemboja’opáramo ha maymáva opu’ã oñoakãre, ndaikatúi upe tetã oiko arévo. Ha peteĩ óga pegua opu’ãmbáramo ojuehe oñehundi avei. Péicha avei, Sataná voi opu’ãrõ ijehe ndaikatu mo’ãi oiko arévo ha oikopáta hese. Avave ndoike mo’ãi peteĩ kuimba’e imbaretéva rógape omonda haguã chupe, ndoipokuái ha ndoipykuái raẽirõ. Péicha ojapóramo mante ikatúne omonda chugui.

Añetehápe ha’e peẽme, Tupã oheja reitaha opavavépe opaichagua pekádo, ha oñeñe’ẽ vai haguére hese jepe. Espíritu Santo rehe ojahéivape katu ndojeheja rei chéne, opytáne hi’ári opa ára guarã.”

Ko’ã mba’e Jesús he’i, ha’ekuéra he’i haguére hese oĩha aña poguýpe.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

            Sapy’ánte ko jaikuaa porã pe ivaíva ha jajapo jeýnte, oje’e porã ñandéve anive, ha jajapo jeýnte, jahechakuaa ivaiha ha ja’a jeýnte pe ñande vísio tujápe. Ha upéicha avei upe iporãva, jaikuaa porã ha ndajajapói, ñambohasa, ágãnte ja’e.

            Pe Ñandejára Espíritu niko oñanduka ñandéve pe iporãva ha avei pe ivaíva. Ha Ñandejára ojevale avei ñande rapicháre ohechauka haguã ñandéve tape porã ha ñane pytyvõ haguã jajeívo ivaívagui.

Umi fariséo kuéra ohecha Hesu omosẽha añáme, oipohano hasývape, ha ndoikoséigui hapykuéri, nohenduséigui iñe’ẽ, ndojaposéigui ha’e he’íva, oñepyrũ omohũ, ombovai ha he’i hese aña rupive ojapoha umíva.

Hesu he’i chupe kuéra, ha ñandéve avei, opaichagua tembiapo vai ojeheja reitaha ñandéve jajeruréramo.  Jajetyvyro ha ñambovaíramo pe Espíritu Santo ohechaukáva ñandéve, ha ñañemohatãramo ñane rembiapo vaípe katu, ñañehundíta.

Rehechakuaápa hina che irũ ha che reindy umi mba’e nde reikuaáva porãva nanepytyvõiha ha ndereraháva tape vai rupi, ikatu haguãicha rehechávo mombyrymígui ou, ejeréma ichugui mbóicha, ha avei umi mba’e nepytyvõ ha ojapo porãva nde rehe, Ñandejára oñandukáva ndéve, umíva ehuguaitĩ ha eheka haguã vy’a pópe.

Pa’i Alberto Luna.