Ñahendu Hesu Ñe’ê. Martes 28 de enero

Escucha el evangelio y la reflexión en: https://youtu.be/u-r0eF34f7s

Martes III Tiempo Ordinario                                                                      Marcos 3, 31 – 35.

Upe aja oguahẽ Jesús sy ha ityvýrakuéra. Opyta okápe ha ohenoika chupe. Umi oguapýva Jesús ykére he’i chupe: Nde sy, nde ryvykuéra ha umi ne reindy oime okapehína, nde reka. Jesús katu he’i: Mávaiko che sy ha máva che ryvy?

Upéi oma’ẽvo umi ijerére oguapývare he’i: Ko’ãva hína che sy. Ko’ãva che ryvy. Ha oimeraẽ ojapóva che Ru rembipota, upévahína che ryvy, che reindy ha che sy.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ñande sy niko tuicha mba’e añete, ñañemosã niko hese ñande rekove ypyete guive ha jakakuaa ijykére, ha ñande tuichapa rire jahecha mba’éichapa ñanembyaty ijerekuévo arete guasu jave, térã katu isánto ára vove, imemby kuéra ojere vaerã hese, ha ojotopa isy rógape, ku ryguasu ombyaty háicha imemby kuéra ipepo guýpe.

            Péina ápe jahecha Hesúpe tuicha riréma, osẽ riréma hógagui, ouha hendápe isy ha ihénte kuéra, ha ohenóiuka ndaje chupe oipota oho hendápe. Ñaha’arõ niko ajépa Hesu opu’ã oheja opavavépe ha osẽ oho isy rendápe. Hesu katu ndojapói péva. Ha mba’érenepa upéicha. Iforsádo imíko hína kóva ajépa che irũ ha che reindy. Pe ñande sy tuicha mba’eramo, ha pe ñane ermáno kuéra orekóva ñande ruguy tuicha mba’eramo añete, tuichave mba’e hina pe ñande jerovia Ñandejárare ome’ẽva ñandéve ñane irũrã, ñande sy, ñande ru ha ñane pehengue pyahu, ñanemopeteĩva peteĩ jeroviápe ha ñanemosãva oñondive Ñandejára famíllaicha.

            Pe jerovia ha Ñandejára ñe’ẽ rendu ñanemopeteĩ hetave ñande rapicha ndive, ija ramo jepe avei umíva apytépe ñande rogagua, ñande sy ha ñane ermáno kuéra, ndaha’éi hína ñane hénte kuéra año, hetave oime opárupi guáva ha heta hetave ambue tetãguáva jepe. Pe jerovia Hesúre niko ojapo ñande hegui Ñandejára familia, iñasãiva oparupi ko múndo pýre ha ipeteĩva Hesu mborayhúpe, ijatýva oñondive pe misahápe, eucaristíape, Hesu ñanerekombo’e ha ñanemongaru hápe.

Pa’i Alberto Luna.