Ñahendu Hesu Ñe’ê. Miércoles 29 de enero

Escucha el evangelio y la reflexión en: https://youtu.be/JnDWE9sKvnU

Miércoles III Tiempo Ordinario Marcos 4, 1 – 20.

Jesús oñepyrũ oporombo’e jevy mar rembe’ýpe. Ha hetágui umi oñembyatýva Jesús
jerére, ojupi ha’e ha oguapy peteĩ kanóape, ha opavave opyta pe y rembe’ýpe. Upe guive
ha’e oñe’ẽ chupekuéra heta mba’ére, ha oiporu ñe’ẽ mbojoja omyesakã haguã chupekuéra
pe he’iséva.

Oporombo’évo, he’i chupekuéra: “Pehendu kóva: ‘Oĩva’ekue peteĩ osẽva oñemitỹ
haguã. Ha omosarambívo pe semílla, oĩ ho’áva umi tape ojeguataha rupi ha ou
guyrakuéra ha ho’upa. Oĩ avei ho’áva itatýpe, yvy ipokãháme. Umíva voi heñói
ipererĩgui pe yvy. Kuarahy ojopévo katu ohapypa, ha ndahapo pypukúigui ipirupa. Oĩ
avei ho’áva ñuatĩndýpe, ha umi ñana okakuaávo ojaho’ipa ha ojuka. Oĩ katu avei ho’áva
yvy iporãháme ha upépe hi’a heta. Oĩ hi’áva 30, oĩ hi’áva 60,ha oĩ hi’áva 100.’”
Upéi he’i Jesús: “Ohendúvake tojapysaka porã.”

Upéi, Jesús opytávo ha’eño, umi oĩva ijypýpe umi 12 apóstol ndive, oporandu mba’épa
he’ise upe ñe’ẽ mbojoja. He’i chupekuéra: “Tupã niko oikuaauka peẽmente umi mba’e
ñemimby Ñandejára Reino rehegua.

Umi okápe oĩvape katu ojekuaauka ñe’ẽ mbojoja rupi, oma’ẽ-ma’ẽvéramo jepe ani
haguã ohecha, ha ohendu-henduvéramo jepe ani haguã oikuaa, ani ágã ojevy Tupã
gotyo ha ha’e oheja rei chupekuéra hembiapo vaikue.”

He’i chupekuéra: “Nahesakãi piko peẽme ko mbojoja? Aipórõ piko mba’éicha
hesakãta peẽme umi ambue? Pe oñemitỹva hína pe omyerakuãva upe ñe’ẽ. Oĩ ojoguáva
pe semílla ho’ava’ekue tapépe: ohendu upe ñe’ẽ ha ou Sataná ha oipe’a pe ñe’ẽ ipy’apýpe
oñeñotỹva’ekue.

Oĩ ojoguáva upe ho’ava’ekue itatýpe: ohendu umi Ñandejára Ñe’ẽ ha vy’apópe
ogueroguahẽ, ha ndahapo pypukúigui ndopyta hatãi ipypekuéra.

Upévare, oiko asy térã ojejopy vaíramo oguerovia haguére pe ñe’ẽ, pya’e ojei chugui.
Umi ojoguáva semílla oñeñotỹva ñuatĩndýpe, umivahína umi ohendúva pe ñe’ẽ.

Ha’ekuéra katu ojepy’apy umi mba’e yvy arigua rehénte voi, ha mba’eta rerekose
ombotavyete chupekuéra. Ko’ã mba’e ojaho’i ha ojuka pe ñe’ẽ ha upévagui ndaikatúi
hi’a. Umi oñeñotỹva yvy porãme katu ojogua umi ohendúva pe ñe’ẽ, ha oikuaa porãva
mba’épa he’ise. Upéi hi’a porã, oĩ hi’áva 30, oĩ hi’áva, 60 ha oĩ hi’áva 100 peteĩgui.”

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Hesu omyesakã rire mba’épa he’ise pe iñe’ẽ, semilla porãicha ho’áva ñande pype, ndaipóri guasuvéima ñambojoapy va’erã, tekotevẽma ñande apysape mba’e térã katu ñañembotavy eterei nañahenduséiramo upe he’íva ñandéve.

Jajerure aipóramo Hesúpe voi che reindy ha nde che irũ, oka’apívo ñande rekovépe toipe’a ñande py’águi umi ñuatĩ ñande aho’íva, tomombo umi ita ñanemopy’a ratãva, ha tomondýi umi guyra ñanemoakã tarováva, ikatu haguãicha opyta ñande pype pe iñe’ẽ porãite, kirirĩhapete heñói ha okakuaáva pe yvy guýpe.

Tamora’e upeichaite avei ñahendúvo ichupe ára ko’ ẽre toguapy ñandy py’áre pe igrásia marangatu, taheñói, tokakuaa ha tahi’a porãite ñande rekovépe.

Pa’i Alberto Luna.