Ñahendu Hesu Ñe’ê. Jueves 30 de enero

Escucha el evangelio y la reflexión en: https://youtu.be/8xwtnzEXVxg

Jueves III Tiempo Ordinario Marcos 4, 21– 25.

Heta ijaty ohendu haguã Jesúspe, ha’e he’i chupekuéra: “Oñemyendy nga’u piko
peteĩ lampĩu oñemoĩ haguã mba’yru guýpe térã tupa guýpe? Nahániri, peteĩ lampĩu
oñemoĩ yvate oporohesape haguã. Upéicha avei ndaipóri okañýva ojehecha’ỹva’erã ha
oñemíva ojekuaa’ỹva’erã. Ijapysávake tohendu.”

He’i avei chupekuéra: “Pehendúke ko ha’éva: Peẽ pejapoháicha pende rapicháre,
Tupã ojapóta pende rehe ha ombojo’avéne. Upe oguerekóvape oñeme’ẽvéta, pe
oguereko’ỹvagui katu upe michĩmi oguerekóva jepe ojepe’áta.”

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Diario, radio, téle, revista, internépe, heta mba’e ikatu jatopa, ha sapy’ánte jahecha umi ivaíva hatãve ojeguerosapukái ha oñemoherakuãve umi mba’e porãgui, ha’etéku ndaipóri voíva iporãmíva mba’e ñamombe’u haguã, térã katu ndojehecha ramói umíva ha oñemotenonde ñe’e pohýi ñanemokangýva, oitýva ñande py’a yvýre.

Ñaikotevẽ oñemyerakuã ñe’ẽ porã ñane rekombo’éva tape porãre, oĩ rupi heta mba’e vai
oñemyerakuã ha oñemombe’úva oparupi, ha umíva ñane pytyvõ rangue ñanembyai,
ñanesambyhy tape vaíre ha upérupi mbyky ñañe desatina haguã.

He’i avei Hesu, pe ñande jajapoháicha ñande rapicháre ojejapotaha ñande rehe, ñande ñama’ẽramo ñande rapicháre ha jahecháramo hese pe ivaívante ha upépe jataky, ñañe’ẽ hese ha jajeity hi’ári, ha ndajahechakuaái mba’eve iporãmíva, nañanemandu’a porãiramo voi hese araka’eve, upéicha avei oikóta ñande rehe, he’i Hesu, ñande trápo ky’a oñemonáta avei ñande rováre jajapo haguéicha ñande rapicháre.

Pe ryguasu ombo’apa ramóva niko hatã okokore, ha oikuaauka ñandéve ombo’a hague, ha péva niko peteĩ mba’e iporãva, michĩramo jepe, ikatu upéi ja’u térã katu ñañongatu, ñambyaty ha ñamoñeno jarekove haguã ryguasu ra’y ñande rógape.

Pe kuarahy opu’ã ha osẽvo omyesakã ha ohechauka Ñandejára rembiapokue, ñande resape
ha jahecha heta mba’e porã, ñande rape ha ñane rembiaporã. Iporã niko umi mba’e porã
oiko ha ojejapóva ojekuaa ñanemokyre’ỹ ha ñanembyetia’e jajapose haguã ñande avei.
Mba’éichapa ikatumíne nde che irũ ha che reindy emyendy avei nde rekovépe umi mba’e porã ohesapéva nde rape ha nde jerére oimévape.

Pa’i Alberto Luna.