Ñahendu Hesu Ñe’ê. Viernes 31 de enero

Escucha el evangelio y la reflexión en: https://youtu.be/o1AhWo4SxXg

Viernes III TO Marcos 4, 26 – 34.

Heta ijaty ohendu haguã Jesúspe, ha’e he’i chupekuéra: “Ñandejára Réinope ojehu, ojehuháicha peteĩ kuimba’e oñemitỹva’ekuépe. Ha’e okérõ térã ipáype, pyhare térã arakue, pe semílla heñói ha okakuaa, ha’e oikuaa’ỹre mba’éichapa. Pe yvýgui niko ijehegui voi heñói raẽ upéi hakã ha upéi heta hi’a. Ha umíva hi’ajúvo oñembyaty, oguahẽmagui mono’õha ára.”

He’i avei Jesús: Mba’épepa ojogua Ñandejára Réino? Mba’épepa ñambojojáta?
Ojogua ku mostása ra’ỹime oñeñotỹva. Mostása ra’ỹigui michĩvéva niko ndaipóri.
Oñeñotỹvo katu okakuaave opa mba’e kokuépe opu’ãvagui, ha guyrakuéra jepe ou
ojaitypo umi hakãre.

Upéicha Jesús oñemoñe’ẽ chupekuéra heta mbojoja ko’ãichagua rupi, ikatu haguã oike iñakãmenguéra. Ha mba’eve nde’íri chupekuéra mbojoja oiporu’ỹre. Idisípulokuérape katu omyesakã opa mba’e upe rire.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Pe ñande retáramo niko ñande ñaimo’ã ñanembareteve, ha ñande resa’iramo katu ñañandu ñanekangyveha. Upévare niko oñekonvidáramo ñembo’erã, oñemboguata haguã komunida, organisasión, aty pyahu, oñeporandu jepi hetápa ijaty ha oime he’íva: sa’i oime, mitã meme, kuñakarai ha tujánte.

Umíva umi cristiano péicha he’íva ha’eteku oipotáva ojeho tupaópe peteĩ procesiónpe jaháramo guáicha banda ha bombapúpe pe calle mbytére partido hápe, fiesta, térã concentración política háperamo guáicha mba’e, oipota heta ijaty ha tuicha hyapu.

Hesu katu he’i pe Ñandejára Réino, ñañemosãramo Hesúre jerovia rupi ha jaguatáramo ñande rapicha ndive ñañemopeteĩvo ñande jeroviápe, ndaha’éi hina tuicha pararãme jaiko va’erã. Ha’e ombojoja pe cristiano jeguata peteĩ semílla michĩmi oñeñotỹvare, kirirĩhápe opytáva pe yvyguýpe ha upépe Ñandejára omoheñói ha omongakuaa ijehegui.

Ñande ñaiménte vaerã che irũ ha che reindy, jaju ha ñañemoĩ pe Ñandejára
kokuépe ha’éva ñande Iglésia, ñande komunida, ñande grúpo, ñande resa’iramo jepe,
ndojekuaáiramo jepe, ha mba’evéramo guáicha, jaikóramo kañymby ñande rapicha
renondépe, ani upévare ñanekangy, Ñandejára omba’apo hina, ojevale ñande rehe, ha
heta mba’e porã omopu’ã, omoheñói ha ombohi’áta hína ñande ikatu’ỹ va’erã jajapo
ñande jehegui.

Pa’i Alberto Luna.