Ñahendu Hesu Ñe’ê. Sábado 01 de febrero

Escucha el evangelio y la reflexión en:  https://youtu.be/uWwq2sIWYjQ

Sábado III Tiempo Ordinario Marcos 4, 35– 41.

Ka’arúmaramo upe árape, Jesús he’i idisípulo kuérape: Jahasa mar mboypýri. Ha omondo rire opavavépe, hemimbo’ekuéra ogueraha Jesúspe upe kanóa oĩháme.

Oĩ ave ambue kanóakuéra omoirũva chupekuéra. Ha peichaháguinte oñepyrũ oipeju yvytu ne ratãva, ha pe y pochy opu’ã pe kanóa ári ha omyenyhẽ ýgui. Jesús katu okehína upe kanóa ruguápe, peteĩ akãngyta ári. Omombáy ha he’i chupe hikuái:

Maéstro, nderehecha kuaái piko ñañapymítamaha?

Jesús opu’ã, oja’o pe yvytúpe ha he’i pe márpe: Ekirirĩ! Epyta upépe!
Ha opi pe yvytu ha oguapy pe y. Upéi Jesús he’i hemimbo’ekuérape: Mba’ére piko
peñemondýi? Ne’ĩra gueteri piko pejerovia?

Idisípulokuéra katu okyhyje eterei ha oporandu joa ojupe:
Máva piko kóva, yvytu ha mar jepe iñe’ẽ rendúva chupe?

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ka’aru oguahẽvo pe tembiapo opa, ñane kane’õ japyta ha ñaguahẽséntema ñande rógape ñañembopiro’y ha jaguapy haguã japytu’umi. Nañande retia’evéima ñaína ñamba’apove térã ñañeha’ã haguã mba’eve guasúre, oguapýma ñande rehe pe kuarahy, ty’ái ñande apére ñane mbopireju’i.

Jahecha Hesu ha ijapóstol kuéra ka’arúmaramo ohasa rire peteĩ ára puku heta eterei ijatýva ijerekuévo apytépe, oñemoñe’ẽ ha oñembo’e rire hesekuéra ára pukukue jave, oheja chupekuéra ha ohasa pe lágo oho haguã opytu’umi idisípulo kuérandive.

Hesu oke atã voi ikane’õgui ha opu’ã peteĩ ama nde vaíva háime omoñapymíva pe
kanóa ohohápe, vaípeko ojecha umi apóstol. Ñañandu ramo Hesu oimeha ñanendive niko ñane kyre’ỹ ha’ete voi jaropu’akapátava oúva guive, ágã katu okañy imíramo ñande hegui, ku oke haguéicha
ijapóstol kuéragui, japytáma ñanekangy, upévo ha’eteku Ñandejára nopenaveiva ñande
rehe. Upéicha jave che irũ ha che reindy, oiméne eñandúma avei nde rekovépe, ou pe
aña, ama pochy hũmbávaicha opu’ã ha ñanembokuchu ñanemoñapymi haguãicha.
Upéicha jajecháramo tekotevẽ avei ñande jaha jasapukái ha jajerure sokórro
Ñandejárape ou haguã omokirirĩ ha ojoko umi yvytu ñanemovã ha ñandereityséva,
tajapyta jey iñe’ẽ rupi py’aguapýpe.

Pa’i Alberto Luna.