Ñahendu Hesu Ñe’ê. Lunes IV de Cuaresma

Escucha el evangelio y la reflexión en: https://youtu.be/2zieEhFCwsk

Lunes IV Cuaresma Juan 4, 43 – 54.

Umíva umi árape Jesús hi’are’imi Samaríape, ha upe ko’ẽ ambuépe osẽ oho Galiléape. Osẽnguévo he’i: “Proféta niko noñemomba’éiva voínte ivállepe.” Oguãhẽvo Galiléape, umi upepegua omoguãhẽ porãite chupe. Ha’e kuéra voi oho vaekue Páskua areterã Jerusalénpe ha upépe ohecha umi mba’e Jesús ojapo va’ekue.

Upégui, Jesús oho Canáme, Galiléape, ojapo haguépe víno ýgui. Oĩ hína ra’e upépe peteĩ
mburuvicha ita’ýra hasýva Cafarnaum puéblope. Ohendúvo Jesús oguãhẽ hague Judéagui,
oho hendápe ha ojerure jey-jey chupe oho haguã Cafarnaúmpe, omonguera haguã ta’ýrape
omanopotaitéva hína. Jesús he’i chupe: — Ndapejerovia mo’ãi voi Ñandejára rehe ndapehechái mba’érõ ajapoha milágro.

Pe mburuvicha katu he’i chupe: — Karai, jaha pya’éna, che ra’y omano mboyve.
Ha Jesús he’i chupe: — Terehónte nde rógape. Nde ra’y oime oikove.

Pe kuimba’e oho hógape ogueroviágui pe Jesús he’íva chupe. Oguãhẽvoma ohóvo
hógape, hembiguái kuéra osẽ huvãitĩvo ha he’i chupe: — Nde ra’y niko oikove.

Ha’e oporandu chupe kuéra araka’e guivépa ita’ýra oñepyrũ ra’e oñeñandu porãve. Ha he’i
chupe hikuái: — Kuehe, asaje pyte riremi opoi chugui iñakãnundu.

Upépe, pe mitã ru imandu’a upe javete Jesús he’i hague chupe: “Nde ra’y oikove”. Upe
guive ha’e ha opa hogagua ojerovia Jesús rehe.

Ko milágro niko mokõiháma hína Jesús ojapo vaekue Galiléape oúvo Judéagui.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Oime niko he’íva: ahecha ha apoko va’erã arovia haguã, chete ahendu va’erã ichugui, ijuru rupi, arovia haguã. Ko karai ita’ýra hasy katúva, jahecha osẽ hógagui, oñemoĩ tapépe ohóvo Hesu rendápe ojerurévo ichupe omonguera haguã ita’ýrape. Ha’e nohendúi, ndohechái ha ndopokóiramo gueteri, iñesperánsa hese ha oñemoĩ tapépe, pe jerovia ha pe esperánsa omomýi ichupe, omboguata ichupe oheka haguã pe oipotáva ha oha’arõva.

Ha uperire ave, oguahẽvo Hesu rendápe, ojerureasy rire ichupe ita’ýrare, ndohecháiramo jepe okueraha, ojerovia jey Hesu ñe’ẽre ha oñemoĩ jey tapépe, ha oguahẽvo hógape ohecha, opoko ha oguerohory Ñandejára remime’ẽ porãite.

Pe jerovia Ñandejárare niko ñanemoĩ tapépe, pe esperánsa ñanemboguata, jaikuaa pype ñande py’ápe Ñandejára nañandereja rei mo’ãiha ha omohendataha ñandéve upe mba’e porã jaipotáva ha ñaikotevẽva.

Mba’épa hína nde che reindy ha che irũ upe reipotavéva ha rehekáva reikóvo.
Reikópa hapykuéri remuña ha reñeha’ã hese, ha upe jave ave, erekópa esperánsa
Ñandejárare ome’ẽvo ndéve upe reipotaitéva.

Pa’i Alberto Luna.