Ñahendu Hesu Ñe’ẽ. Martes 23º Durante el Año

Escucha el evangelio y la reflexión en: https://youtu.be/Rup4IZS1wUM

Martes 23º Durante el Año Lucas 6, 12 – 19

Umíva umi árape, Jesús ojupi peteĩ sérro ru’ãme oñembo’e haguã. Ha pyhare pukukue opyta upépe. Ko’ẽ rire ohenói umi idisípulope hendápe, ha oiporavo 12. Umívape ohenói apóstol.

Umíva hína: Simón, Jesús ombohéra vaekue avei Pedro, ha tyvýra Andrés. Upéi oĩ Santiágo, Juan, Felipe, Bartolomé, Mateo, Tomás, ha Santiágo, Alféo ra’y. Avei Simón, Selóte oje’eha, Judas, Santiágo ra’y; ha ipahápe Judas Iscariote, ku upéi otraisiona vaekue Jesúspe. Jesús oguejy idisípulo kuéra ndive pe sérrogui, ha opyta hikuái ñúme.

Oñembyatypa ra’e upépe umi hapykuéri oikóva. Heta avei oĩ oúva Judéagui, Jerusalén, Tíro ha Sidóngui. Ou ra’e hikuái ohendúvo Jesúspe, omonguera haguã chupekuéra imba’asýgui. Umi demóño po guýpe oikóva okuerapánte avei.

Maymávante opokose Jesús rehe, oikuaágui pe pu’aka osẽva chugui omonguerataha chupekuéra.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE

Heta niko oime ijatýva Jesús jerere. Opaichagua oĩ. Oime oúva sapy’ánte ohendu chupe ha upéi oho jey hógape. Oĩ opyta miéva hendive, oguata ha omoirũva chupe hetave ára pukukue.

Oĩ katu ojejokuáiukáva voi chupe. Umíva ha’éta hína umi oñehenóiva “disípulo”, temimbo’e, kuimba’e ha kuña omoirũva Jesús pe. Ha upéi katu oĩ umi oikóva voi hendive oparupiete, ára ha pyhare omoirũva chupe ohohápe, ha oñemosãitéva voi hese. Umíva ha’e hína apóstol kuéra. Jesús voi oiporavo va’ekue oiko haguã hendive.

Ha mba’éicha rupípa Jesús ohenói chupe kuéra. Marãpa ohenói. Omombe’u niko ñandéve San Lucas hetaitereimaha umi ijatýva iválle ha oparupigua oúva Jesús rekávo, ohenduséva iñe’ẽ ha okueraséva imba’asýgui. Ha Jesús oñandu ha’eño ndaipu’akái ha ndakatuveimaha oñatende porã opavave rehe.

Oikotevẽ iñirũra omoguahẽ haguã pe Ñandejára gracia heta hetavépe ou meméva oheka ichupe. Ha umi oúva opokosénte jepe Jesús re, oikuaágui osẽha ichugui peteĩ pu’aka marangatu omongueráva opavavépe. Ha péva pe pu’aka marangatu Jesús orekóva niko ha’e omboja’o ha ombohasa kuri ijapóstolkuérape, oipytyvõ haguã ichupe, ohupytyka haguã hetavépe, ha upéi opyta haguã ñandéve guarã avei Jesús rekovia.

Ñande voi avei, che reindy ha nde che irũ, ñaikotevẽva Jesús ñanepohãno, ha jaipotáva ha’e opokomínte jepe ñande rehe jakuera ha ñande py’aguapy haguã, ikatu ñañemboja umi Jesús oheja vaekue rehe ñandéve hekoviáramo ñande Iglesia pe.

Ñandejára rembijokuái ñaneperdona, ñanemongarúva Jesús retépe, oñembo’éva ñande rehe, ñanderovasa, ñanembo’éva Ñandejára rape. Jesús ete voi ojapóramo guáicha ñande rehe.

Pa’i Jasy.