Ñahendu Hesu Ñe’ê. Martes II de Cuaresma

Escucha el evangelio y la reflexión en: https://youtu.be/8GiNCu_2ZTs

Martes II Cuaresma Mateo 23, 1 -12.

Jesús oñe’ẽ jave idisípulokuéra ndive, he’i chupekuéra: Umi fariséo ha umi Moisés léi ombo’éva niko hína umi oikuaavéva mba’épa oĩ hína Moisés léipe. Upévare, pene ñe’ẽ rendu va’erã chupekuéra ha peñeha’ã vaerã pejapo opa he’íva peẽme. Umi mba’e ojapóvante ani pejapo. Ha’ekuéra niko he’i peteĩ mba’e, ha ndojapói pe he’íva. Ñande apére oity heta mba’e pohýi, ha’e kuéra katu ikuã’ínte jepe nomongu’éi ojapo haguã.

Opa ojapóva, ojechauka haguãnte ojapo. Omboja isyváre térã ijao jyváre Ñandejára Ñe’ẽ
pehẽngue mimi. Ha umi ijao katu ombofléko puku-puku ohechauka haguã gua’u ojapoha opa mba’e Ñandejára oipotáva. Tupaópe térã karu guasuhápe ohórõ katu, ku poguasúrõ guáicha gua’úko oikose. Jajotopa ramo hendive kuéra oimehápe rei, oipota tuicha ñamomaitei chupe kuéra ku ñane maéstro guasu guaichárõ ha’ekuéra.

Peẽ katu, ani peheja avavépe he’i peẽme peẽ maéstroha. Peẽ niko ojoryvy, ha peteĩnte pene maéstro. Ha ani avavépe peje “che ru”. Peteĩnte niko pende ru, ha ha’e oĩ yvágape. Ani avei peheja avave he’i peẽme “myakãhára”. Che añónte, pe Mesías, pene myakãhára hína. Pe tuichaséva pende apytépe, toiko ku tembiguáirõ guáicha ha’e. Umi ojejapo ha oñembotuicháva niko oñemomichĩ va’erã ágã, ha umi heko mirĩva katu oñembotuicháne.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Jaikua pe ñe’ẽnga he’íva: “Pa’íma he’i”, jaikuaa avei pa’i ñe’ẽ oñehenduveha ambue ñande rapicha ñe’ẽgui, obispo ñe’ẽ katu tuichave mba’éma hina, ha Karai Pápa ñe’ẽ katu yvatevéntema oinupã.

Pa’i niko oñembojerovia ha oñemotenonde, “pa’ípe guarãicha iporã” he’íva voi ningo ñe’ẽ oiméramo yva térã tembi’u porãnguete apytégui ojeporavo chupe guarã.

Hesu he’i ñanembo’éva Ñandejára rape ñahendu va’erãha, jepe hekove nomboguata
porãmbáirõ, ani upévare ñande ja’éma avei vyroreiha upe he’íva. Ahániri, nañahendúiramo upe Ñandejára ñe’ẽ omombe’úva ñandéve ndaha’éi chupe nañahendúiva, Ñandejárape nañahendúi hina.

Ikatúko hína che reindy ha nde che irü, ñande pa’i, hermana, obispo, catequista, animador, coordinador, ndaijukypái, ikatu voi sapy’ánte ijarhél imi mba’e voi, opáichavo Hesu he’i ñahendu va’erãha pe ñanembo’éva ha ñañeha’ã jajapo.

Peteĩnte ñande ruvicha guasu hína, ha péva ha’e Ñandejára, oiméramo ñande iglésiape oñemoĩva omyakã haguã, péva ndaha’éi hina oñemoĩ haguã hapicha akã ári, pe tenonde oñemoĩva ojapo vaerã Hesu, ñande ruvicha, ojapo haguéicha, oñangareko mborayhúpe, omoirü ha ohekombo’e opavavépe, ko’yteve umi imboriahu, ikangy ha oikotevẽvévape. Pe oñembotuicháva hapicha renondépe upéva upéi oisu’úta yvy, ha pe oñemomichĩva hapicha renondépe, upévape Tupã ombopojáita yvágare.

Pa’i Alberto Luna.