Ñahendu Hesu Ñe’ê. Viernes II de Cuaresma

Escucha el evangelio y la reflexión en: https://youtu.be/Pt8Vk9SVvYI

Viernes II Cuaresma Mateo 21, 33 – 46

Hesu he’i umi pa’i ruvicha kuéra ha Israel myakãhára kuérape: Peteĩ karai ndaje oñotỹ raka’e peteĩ parralty ikokuépe. Omongorapy ha ojapo peteĩ piléta víno ojejapo haguãme. Omopu’ã ave peteĩ sovrádo upégui oĩ haguã omañáva ha oñangarekóva ikokuére. Upéi katu, oarkila ha osẽ oho mombyry.

Ha oguãhẽ upe parral ojepo’oha ára, víno ojejapo haguã. Upépe pe yvy jára omondo hembiguái kuérape ojerurévo upe chupe ohupytýva. Umi oarkila vaekue katu ojeity umi tembiguái ári. Peteĩme heta oinupã, pe ambuépe katu ojuka hikuái, ha pe mbohapyha ojapi itápe ojuka peve hikuái.

Upéi katu pe yvy jára omondo hetave hembiguái kuéra, ha oiko hese kuéra umi tenonde oho
vaekuéicha.

Ipahápe omondo ta’ýra teépe, he’ígui ipy’apýpe: “Che ra’ýpeko ohendu va’erã hikuái”. Ohechávo hikuái pe yvy jára ra’ýpe katu, he’i hikuái: “Kóva yvy járata hína ágã túva omano vove. Jajuka ha topyta ñandéve ko yvy”. Ha ojeity hi’ári hikuái. Oguenohẽ pe kokuégui ha ojuka.”

Upéi Jesús oporandu: — Ágã pe yvy jára ou vove, mba’épa peje ojapóne haguã.
Ha he’i hikuái chupe: — Ojukapaite vaerã niko umi tekove ahẽ. Upéi katu oarkiláne
ijyvy ambuépe ome’ẽ vaerãva chupe pe imba’éva.

Upépe Jesús he’i chupe kuéra: — Na pene mandu’ái aje Ñandejára Ñe’ẽme he’iha: “Pe ita omboyke vaekue umi óga omopu’ãva péva ári ko’ágã oñemopu’ã tupao.

Péicha ojapo Ñandejára, ha ñande jurujái jahechávo.” Upévare ha’e peẽme, Ñandejára Rréino ojepe’áta pende hegui ha oñeme’ẽta umi ojapóvape Ñandejára rembipota. Ha oimeraẽva oñepysãngáva ko itáre, opẽmbaiténe. Ha ho’a ramo pende ári katu, pene mongu’i paiténe.

Umi pa’i ruvicha ha fariséo kuéra ohendúvo pe káso Jesús omombe’úva, ohechakuaa hikuái hesekuéra he’iha. Ha oapresase mo’ã hikuái Jesúspe. Noñanimáinte hikuái okyhyjégui opavavégui. Oje’e niko Jesús rehe ha’e profetaha.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Túva ha sy oñeha’ã omondo eskuéla, koléhio ha universidápe ifamília, estado omopu’ã eskuéla ha koléhio omoarandu haguã ñane retãguáme. Oñeha’arõ upéi ikatupyry rire pe tapicha ome’ẽ ijehegui hogagua ha ikomunidápe. Ikatúko ou oñemomba’e pe iñarandukuégui, oñembyesarái itúva ha isýgui, otĩ chuguikuéra, ha nomyengoviái upe oñeme’ẽ va’ekue ichupe.

Ehechápa che irũ ha nde che reindy, heta mba’e oñeme’ẽ hague ñandéve, ñañemongarai, oĩ vaekue ñanembo’éva Ñandejára rape catecísmope, primera comunión, confirmaciónrã, heta oĩ oiko vaekue ñande reheve oiko haguã ñande hegui cristiano porã. Mba’éichaitépa ikatúne jahechakuaa umi mba’e porãita ha ñame’ẽ avei ñande jehegui ñamyengoviávo umi mba’e Ñandejára rayhupápe oñeme’ẽ vaekue ñandéve.

Pa’i Alberto Luna.