Ñahendu Hesu Ñe’ê. Miércoles 22 de enero

Escucha el evangelio y la reflexión en: https://youtu.be/EvXyVcs2Cgk

Miércoles II Tiempo Ordinario                                                      Marcos 3, 1 – 6.

Jesús oike jevy tupaópe, ha upépe oĩ peteĩ kuimba’e ipo atãva. Ha oma’ẽ hikuái Jesús rehe, jahecha omonguerápa chupe pytu’uha árape, pévare upéi omoĩ vai haguã  chupe.

Upérõ Jesús he’i pe kuimba’e ipo atãvape. Epu’ã ha eñemoĩ pe mbytépe.

Upéi oporandu umi ambuépe: Mba’e-mba’épa ikatu jajapo sábado árape: ivaívapa, térãpa iporãva. Japoromonguera térãpa japorohundi.

Ha’ekuéra katu okirirĩ guasúnte.

Upérõ Jesús oma’ẽ pochy umi ijerére guáre ombyasývo ipy’a ratãha hikuái. He’i upe kuimba’épe: Eipyso nde po.

Pe kuimba’e oipyso ipo ha okuera. Upéi, umi fariséo osẽ oho. Oñepyrũ oñomongeta Herodes reheguakuéra ndive mba’éichapa ikatúta ojuka Jesúspe.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

            Ñatĩ ningo sapy’a ñande rapicha renondépe jajapo haguã iporãva, ndaja’eséi ñañembo’eha, jahaha tupaópe. Ñaiméramo omokõva apytépe ndaja’eséi tove, itie’ỹva rovake ñakirirĩ guasúnte ha ñañembotavy, ndaja’eséi chupe ivaiha iñe’ẽ térã hembiapo. Jakyhyje ningo oje’éramo guarã ñande rehe ñane santulárioha, tupao raso, oñembohory ha ojepuka ramo guarã ñande rehe lo mitã mba’e.

            Péina jahecha Hesu apére oñe’ẽ reity umi fariseo, ha oma’ẽ ñemi hese upéi ojepoi haguã hi’ári kávaicha. Ha’e katu oikuaa porã pype mba’épa oreko iñakãme hikuái, oñemoĩ voi henondetépe, mbytépe porã ha opavave rovake, oñehendu haguãme oñe’ẽ, oñembo’e, ojehecha haguãme oipohano hasývape.

            Ndaipóri niko mba’ére ñakañy haguã jajapóramo iporãva, ndaipóri mba’ére ñakirirĩ haguã ñamombe’u haguã mba’e porã Ñandejára ñanembo’éva ha oñandukáva ñandéve. Hesu ñanembopy’a guasu anive haguã jakyhyje tálla ha ñe’ẽgui.

            Ñanemandu’a meme hese aipo ramo che reindy ha nde che irũ, ñaime vove ñande avei ñahenonde’a haguãme hendape’ỹva, jajapóvo ha ja’évo añeteguáva ha iporãva Ñandejára rérape.

Pa’i Jasy.