Ñahendu Hesu Ñe’ê. Miércoles 28 de agosto

Ñahendu Hesu Ñe’ê. Miércoles 28 de agosto  

Miércoles XXI TO                                                               Mateo 23, 27 – 32.

Upérõ Jesús he’i:    Pejererekóke peẽ Moisés léi pembo’éva ha peẽ fariséo rova mokõi. Peẽ niko pejogua umi sepultúra, okáguio ipotĩ ha morotĩ asýva, hyepy katu henyhẽ te’õngue kãnguekue ha mba’e ky’águi.  Peichaite avei niko peẽ. Ñamaña ramo pende rehe, pende reko porãvaicha. Pene korasõme katu pene renyhẽ japu ha ñañágui.

     Pejererekóke peẽ Moisés léi pembo’éva ha peẽ fariséo rova mokõi. Pemopu’ãva panteon hamba’e proféta kuérape, ha umi karai marangatu monumento pembojeguapa.   Upéi katu peje, “Ore roikove rire ore ypykue oikovérõ guare, ore ndorojukái vaerã mo’ã umi proféta kuérape.”   Péicha pejévo, pehechauka peẽha voi hína umi proféta jukahare ñemoñare.   Pemoguãhẽ upéicharõ hu’ãme umi pende ypykue omoñepyrũ vaekue.

Ñandejára Hesukrísto ñe’ẽ. 

ÑAMBOGUEJY ÑANDE REKOVÉPE …

Ñanemandu’a niko ñane sánto kuéra árare, ñane sánto térã sánta patróna ihunción jave.Tuicha háicha oñembosako’i jeguaka, ao porã, música pu, oñemopotĩ óga jére, oñemboyvoty ha oñemyataindy, oñemomorã ha ojeguerohory.

Oiko jave ñemenda, aniversario, mitã karai ha mba’e, hetaite mba’e ñamboverapa aja vy’a guasurã, iporã vaerã avei jareko ñande resa renondépe ko Hesu ñe’ẽ ñanemomandu’áva tekotevẽha ñamopotĩ raẽ pe ñande py’apy. Ani ñande apéguionte ñamimbipa ha ñande ryepýguio katu japyta ñande tajasu, ha ohasa rire pe procesión, mísa guasu, ñembo’e purahéi ha mba’e, ype apére ýicha japyta. 

Ñama’ẽ vaerã upévarã mba’éichapa jaguata jaikóvo, ñañamindu’umi ñande rapykuerére Ñandejára renondépe ha ñande rapicha ndive. Ñahesa’ỹijo ñane rembiapo vaikue, ñambyasymi ñande py’aite guive mba’e vaieta jajapo vaekue, ha uperire katu iporãvéta ntema ñañembojáramo ñañemombe’u mba’e, upéi py’a porãme jaha ñakomulga, jakaru Hesu mesápe. 

Ikatu aveíko jahayhuete umi sánto ymaguare, ñande koty ñembotypýpente ñambojegua yvotypa ha tuicha ñamyataindy ñande níchope, ha ñande katu nañañembojái tupaóre ha nañanderapykueréi ñembo’e hárupi, komunida kapíllape, ñande parróquiape, ha’e kuéra ojapo haguéicha. 

Iporã niko ñane sánto rayhu ha ñamomba’e umi ñande rapicha oguata vaekue hekoitépe Hesu rapére, umíva niko ñande abogádo ha ñane irũnguéra hina, ha oĩ voi ñane pytyvõ haguãicha. Opáichavo iporãvéta hína che reindy ha nde che irũ,  ñama’ẽ ramo hekovére ñande avei ñañeha’ã haguã jaguata ha’e kuéra oguata haguéicha. 

Pa’i Jasy.